ریڈیو زْرمبش بلوچی | ریڈیو زْرمبش بلوچی

بلوچستان آجوئی سنگر ( بی ایل ایپ ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ دوشی شپ ءِ ھپت ءُ چِل ءَ کیچ ءِ بنجاھی شھر تربت ءَ نیوی ءِ بنجل ءِ گوریچانی نیمگ ءِ پھازداری سنگر گوں وتکار ءُ ٹوھیں سلاھاں نشانگ کُرتگ۔ آئی ءَ گوشتگ کہ سرمچاراں چہ نزیک ءَ سنگر نشانگ کُرتگ کہ چہ ایشی ءَ دو کارمند ٹپی بیتگ ءُ سنگر ءِ دیوالاں تاوان بیتگ۔اُرش ءَ پد زورگریں لشکر ءَ آبادی ءِ سر ءَ تیرگْواری کُرتگ۔ جارکش ءَ گوشتگ کہ چہ نیوی ءِ ھمے بنجل ءَ سرجمیں مکران ءَ لشکرکشی ءِ کار بنگیج ءُ چارگ بنت، چار روچ بیت کہ سیاھجی ءِ کوھاں لشکرکشی برجاہ اِنت، زمینی لشکر ءِ ھواری ءَ ڈرون ھم بھر زورگ ءَ اَنت کہ اے لشکرکشی ءِ کار چہ ھمے نیوی ءِ بنجل ءَ بیگ ءَ اِنت۔ بی ایل ایپ ءِ جارکش میجر گھرام ءَ اُرش ءِ زمہ واری منّ اتگ ءُ گوشتگ کہ داں بلوچستان ءِ آجوئی ءَ دُژمنیں لشکر ءِ سر ءَ اُرش برجاہ بنت۔