بلوچستان آجوئی سنگر ( بی ایل ایپ ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ 12 نومبر 2024 ءَ سرمچار بالگتر ءَ گل ءِ مشنے ءَ بوتگ اَنت کہ دژمن ءِ گون ءَ یک میڑے ءَ گل ءِ سیکنڈ لیپٹنینیٹ آزم پنام کاسم ء مھمد رھیم جاہ منند تیرتیج آواران، سیکنڈ لیپٹنیٹ انور پنام سنا جان ء ھسین جاہ منند رید توک بالگتر، ارب نوزار پنام جھانزیب جاہ منند گریشگ ءُ زھیر آزاد ء پزل جاہ منند بیرونٹ کیلکور ءَ پہ سرڈگار ءِ دیمپانی ءَ دژمن ءِ گون ءِ گوں نہ ترسی ءَ مڑ اتگ ءُ شھید بوتگ اَنت۔
جارکش ءَ گوشتگ کہ سیکنڈ لیپٹنینٹ آزم پنام سنگت کاسم 2013 ءَ بلوچ راجی آجوئی جھد ءَ بی ایل ایپ ءَ ھوار بوتگ۔ آ یک ھیلکاریں چیرجنگی سرمچار ءُ سکا جپاکش ءُ نوکیں چیرجنگی شوربندی ءَ سریچیں ھمبلے بوتگ۔ آئی پہ گل ءِ دیمروئی ءُ مھکم کنگ ءَ جوانیں کردے پیلو کرتگ۔ آئی جنگاں گچک، آواران، کیلکور، کولواہ، بلیدہ، زامران ءُ آدگہ جاھاں زورگریں لشکر ءِ بگیری ءَ جنگاں بھر زرتگ۔ آئی جھد ءُ سگینی دیستگ اَنت گڑا گل ءَ آئی ءَ اوتاک ءِ ھمبلانی جنگی ھیلکاری ءِ زمہ واری داتگ اَنت ءُ آ اے میان ءَ گل ءِ سیکنڈ لیپٹنینٹ ءِ بستار ءَ وتی زمہ واری شریں وڑے ءَ پیلو کرتگ اَنت۔ شھیدیں ھمبل ءَ گوستگیں یک سالے بیت کہ آئی کربان یونٹ ءَ بھر زرتگ۔
آئی ءَ گوشتگ کہ سیکنڈ لیپٹنینٹ انور پنام سنا چہ 2017 ءَ راجی آجوئی زرمبشت ءَ بی ایل ایپ ءَ بھر زرتگ۔ آ چہ وتی جھد، بودناکی ءُ جپاکشی ءِ سوب ءَ باز کسانیں وھدے ءَ ھمے جاہ ءَ سر بوتگ۔ سال 2023 ءَ آ دژمن ءِ گون ءَ یک میڑے ءَ ٹپی بوتگ ءُ چہ ایشی پد نومبر 2023 ءَ دژمنیں لشکرءَ آئی کھول ءِ سے زور بیگواھیں ورنا یک دروگیں میڑے ءَ شھید کرتگ اَنت۔ بلے آ چہ وتی آجوئی ءِ لیکہ ءَ پدکنز نہ بوتگ ءُ شھید ءَ جتائیں جنگاں بی ایل ایپ ءِ راھبند ءِ سر ءَ پہ راجی آجوئی ءَ کرد پیلو کرتگ۔ آئی اورماڑہ، کولواہ، کیلکور، بلیدہ، زامران، پروم ءُ وتگڑیں سی پیک ءِ مزنیں جنگاں دژمن ءِ تاوان دیگ ءَ وتی شریں وڑے ءَ کرد پیلو کرتگ۔ آ اے میان ءَ گل ءِ سیکنڈ لیپٹینیٹ ءِ بستار ءَ وتی زمہ واریاں شریں وڑے ءَ پیلو کنگ ءَ بوتگ۔
جارکش ءَ گوشتگ کہ شھید ارب نواز پنام جھانزیب 2021 ءَ راجی آجوئی زرمبشت ءَ گوں بی ایل ایپ ءَ ھوار بوتگ۔ آ یک سکا ایماندار ءُ جنگولیں سرمچارے اَت ءُ گل ءِ ھم کار ءَ چڑکہ بوتگ۔ آئی ءَ گل ءِ راھبند ءَ جاؤ، گریشگ، آواران، کیلکور، مشکے ءُ کولواہ ءَ ابید بازیں جنگاں دژمن ءِ بگیری ءَ ھوار بوتگ ءُ دژمن ءِ پروش دیگ ءَ جوانیں کرد پیلو کرتگ ءُ باز بر ءَ دژمن ءَ انگر کرتگ بلے چہ وتی سوبمندیں شوربندی ءُ نہ ترسی ءِ سوب ءَ در آھگ ءَ سوبین بوتگ۔
آئی ءَ گوشتگ کہ زھیر پنام آزاد 2022 ءَ پہ بلوچ راجی آجوئی زرمبشت ءَ گوں بی ایل ایپ ءَ ھوار بوتگ۔ آئی بالگتر، کیلکور، بلیدہ ءُ دگہ بازیں جاھاں جنگاں دژمن ءِ بگیری ءَ بھر زرتگ ءُ دژمن ءِ پروش دیگ ءَ جوانیں کردے پیلو کرتگ۔ آئی گوں ایمانداری، نہ ترسی ءُ جپاکشی ءَ وتی شپ ءُ روچ پہ بلوچ راجی آجوئی ءَ ببا داتگ اَنت۔ آ یک سکا نہ ترس ءُ زانوگریں سرمچارے بوتگ۔
جارکش ءَ گوشتگ کہ پہ بلوچ سرڈگار ءِ آجوئی ءَ جان ندر کنوکیں درسیں شھیداں دروت ندر کن ایں۔ راج ءِ نہ ترسیں پسگ شھید بوتگ اَنت ءُ راج ءَ را آجوئی ءِ راہ پیش داشتگ۔
آئی ءَ گوشتگ کہ چہ ھمبلانی شھیدی ءَ مئے توکل نزور نہ بیت بلکیں آجوئی ءِ وڑیں پہ گرانبھائیں منزل ءَ شھیدانی رتکگیں ھون پما مادنیں راہ جوڑ بنت۔
میجر گھرام ءَ گوشتگ کہ بی ایل ایپ وتی ھمبلیں سرمچار سیکنڈ لیپٹنینٹ شھید آزم پنام سنگت کاسم، سیکنڈ لیپٹنینٹ شھید انور پنام سنا، شھید ارب نواز پنام جھانزیب ءُ شھید زھیر پنام آزاد ءَ ھوار بلوچ راجی آجوئی جھد ءِ راہ ءَ شھید بوتگیں درسیں شھیداں آیانی دیمونی ءِ سر ءَ ستک شانی ندر کنگ ءِ ھواری ءَ ھمے اھد ءَ کن ایں کہ شھیدانی دیمونی کدی شموشگ نہ بنت بلکیں داں بلوچستان ءِ آجوئی ءَ یکشل ءَ برجاہ بیت۔
