تربت: کیچ ءِ ھند زریں بگ ھسادیگ ءِ جاہ منند پیرزالیں گنج ھاتون ءَ تربت پریس کلب ءَ تران کرتگ ءُ گوشتگ کہ منی دو زھگ پولیس کارمند نسیرالدین ء بھرام ءُ مھمد یونس ء بھرام جاہ منند ھسادیگ زربگ 13 سال پیش پجار نہ بوتگیں سلاہ بندیں مردماں آوار جتگ ءُ بیگواہ کرتگ اَنت کہ انگت بیگواہ اَنت۔ پہ آیانی آجوئی ءَ بلوچستان ءِ مزن آمیدگس ءَ پٹیشنے جم کرتگ ءُ چنچو بر ءَ شال ءَ آمیدگس ءَ شتگ آں۔
آئی ءَ گوشتگ کہ چہ ایشی ابید چہ مکران ڈویژن ءِ کیچ کمک دمگدار ءَ لوٹ ءَ کرتگ بلے پہ منی دوئیں بیگواھیں زھگانی باروا ھچ وڑیں گامگیج زورگ نہ بوتگ۔ من انچو ھم نہ زاناں کہ منی زھگ کجام ادارہ ءَ دزگیر کرتگ اَنت ءُ کجام لشکر ءِ کِر ءَ آں۔ من ھمے دزبندی کن آں منی زھگ کئی کِر ءَ اَنت پہ ھدا ءِ نام ءَ یل کنگ بہ بنت۔
بی بی گنج ھاتون ءِ گوشگ اِنت کہ آئی گوستگیں سالاں گوں کھول ءِ ھواری ءَ چہ زریں بگ ءَ لڈ ءُ بار کرتگ ءُ گیبن تربت ءَ آتکگ ایں، انوں گیبن ءَ نشتگ ایں۔ گیبن ءَ سیزدہ سال پیش لشکرکشی ءِ میان ءَ لھتے مردم جنگ بوتگ اَنت، چہ اے ویل ءَ لھتے روچاں منی زھگ پہ وتی سیادانی چارگ ءَ ھسادیگ ءَ شتگ اَنت اود ءَ لھتے روچ ءِ نندگ ءَ پد واتری آھگ ءَ بوتگ اَنت کہ راہ ءَ بیگواہ کنگ بوتگ اَنت۔ پد ءَ ھما اِنت آیانی باروا ھچ وڑیں سرپد نیست۔ نسیر اللہ پولیس کارمندے ءُ وتی کار ءَ روگ ءَ بوتگ۔
آئی ءَ گوشتگ کہ ھما ھپتگ ءَ کیچ ءِ کمک دمگدار ءَ من ءَ یکبرے منی زھگانی باروا ھال دیگ ءِ گوشتگ بلے پد ءَ چہ نادراھی ءِ سوب ءَ من کمک دمگدار ءِ کارگس ءَ شت نہ کرتگ۔ من ھمے لوٹ ءَ کن آں کہ من ءَ مدام کارگس ءُ آمیدگساں مہ لوٹ اِت پمیشکا کہ من نوں پیرزالاں ءُ چہ بازیں روگ ءُ آھگ ءَ ھم بے اوست بوتگ آں۔ من ھمے لوٹ ءَ کن آں کہ منی دوئیں زھگاں زوت آجو بہ کن اِت۔
