پہ مردمی ھکاں داد گپتگیں کارکن ءُ وی بی ایم پی ءِ کارگشاد سمی دین ءَ ماں چاگردی رسانکدر ایکس ءَ بلوچ راجی مچی ءِ بگیری ءَ ریاست ءِ زوراکیانی پژدر ءَ دو جتائیں پوسٹاں نبشتگ کہ بلوچ راجی مچی ءِ تکشام ءَ کراچی ءَ ھوار سرجمیں بلوچستان ءَ بلوچ یکجھتی کمیٹی ءِ کارکنانی بگیری ءَ درکانودی کاروائی ءُ مردمانی گوں جتائیں ھیلھاں دلسیاہ کنگ ءِ درچ برجاہ اِنت۔
آئی ءَ گوشتگ کہ دوشی چہ کراچی ءَ چار مردم شھداد، سدام، باسد ءُ ابدرھمان کہ پہ راجی مچی ءِ سرپدی تکشام ءَ چندہ یکجاہ کنوکیں کارکن چہ نوالین ءَ پولیس ءَ دزگیر کنگ ءَ پد چیریں آزارجاھے ءَ بند کرتگ اَنت کہ آیانی باروا کس ءَ ھال دیگ ءَ نہ اَنت۔
سی دین ءَ گوشتگ کہ آواران ءَ 13 پرکاریں جنیناں ھوار دو کسانیں زھگ پولیس ءُ چیریں ادارھاں دزگیر کرتگ ءُ پولیس گس ءَ برتگ اَنت اود ءَ کس ءَ آیانی گندگ ءِ موکل ءَ دیگ ءَ نہ اَنت۔
وی بی ایم پی ءِ سروک ءَ گوشتگ کہ چے ریاست مارا ھمے پیش دارگ ءَ اِنت کہ اے ریاست ءَ پرایمنیں زھرشانی ءِ ھک بلوچاں نیست؟اگاں انچوش اِنت گڑا مارا تچک ءَ بہ گوش ایت اے وڑیں نزوریں ھیلہ پیش مہ کنت۔
سمی دین ءَ دیمتر ءَ گوشتگ کہ بلوچ راجی مچی ءِ سرپدی تکشام ءَ بلوچستان ءِ جتائیں ھنداں پرکاریں کارکنانی بگیری ءَ ایپ آئی آر نبیسگ بوگ ءَ اِنت۔ اے درچ ءَ مستونگ، کلات ءَ ھوار ھب چوکی ءَ ایپ آئی آرءَ منی گون ءَ ھواردرزنانی کچ ءَ مردمانی نام ھوار اَنت۔ گوستگیں روچ ءَ ھب ساکران ءِ پر ایمنیں مچی ءِ نیمون کرتگ ءُ ناشرکاری ءِ ارزی نبیسگ ریاست ءِ ترس ءَ پیش دار ایت۔
آئی ءَ گوشتگ کہ انچوش گندگ بوگ ءَ اِنت کہ پہ بلوچ سیاسی کارکنانی ترسینگ ءَ بے بیادیں ارزی نبیسگ ءَ اِنت، چہ ھمے ھیلھاں ساپ گندگ بیت کہ کے چہ کے ءَ ترس آماچ اِنت۔
