بلوچستان آجوئی سنگر ( بی ایل ایپ ) ءِ جارکش میجرگھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل ایپ ءِ سرمچاراں ھژدہ مئی ءِ سُھب ءِ دہ ءُ نیم ءَ چین پاکستان اکنامک کوریڈور (سی پیک) ءَ برجاھیں شوربندی کہ یک دگے ءِ جوڑ کنگ ءَ بیتگ، اُرش کُرتگ گاڑی ءُ مشین مانداشتگ اَنت۔اے دگانی جوڑ کنگ ءِ مول بلوچستان ءِ وتگڑیں دیمروئی نہ اِنت بلکیں پہ بلوچستان ءِ مڈّیانی لُٹگ ءَ راھانی گیش ءُ گیوار کنگ اِنت۔
آئی ءَ گوشتگ کہ گوادر ءِ ھند نلینٹ ءَ سرمچاراں بند ساچی شرکت (ایپ ڈبلیو او) ءِ شوربندیاں ھوار بیتگیں ھندی ٹیکدار ءِ بُنجاہ ءِ سر ءَ اُرش کُرتگ۔ اُرش ءَ گاڑی، ڈمپر، لوڈر ءُ آدگہ مشین مانداشتگ اَنت۔
جارکش ءَ گوشتگ کہ ما باز رند ءَ ھندی ٹیکدار کڈن کُرتگ اَنت کہ آ زورگر ءِ شوربندیاں ریاست ءِ ھمراھداری ءَ مہ کن اَنت۔کڈن کنگ ءَ ابید ھوار بیگ بلوچ راجی نپانی بگیری ءَ ھما ریاست ءِ ھمراھداری کنگ کہ بلوچ چُکچینی ءَ ھوار اِنت۔
آئی ءَ گوشتگ کہ اے اُرشاں کڈن سرپد بہ بنت ءُ چہ گیشتریں تاوان ءِ رَکگ ءَ چہ ریاست ءِ لُٹ ءُ پُلی شوربندیاں گستاہ بہ بنت۔
میجر گھرام ءَ وتی درشان ءِ گڈی ءَ گوشتگ کہ اے اُرش داں بلوچستان ءِ آجوئی ءَ برجاہ بنت۔
