شال ءَ پہ بیگواھیں مردمانی پد جنگ ءَ وائس پار بلوچ مسنگ پرسنز ءِ زھرشانی گدانءَ شال پریس کلب ءِ دیم ءَ 6157 روچ سرجم بوتگ۔ مرچی گل ءِ چیئرمین نسر اللہ بلوچ گدان ءَ ساڑی بوتگ۔
جتائیں بھرگاں سیادی داروکیں مردم گدان ءَ اتکگ اَنت ءُ گوں زور بیگواھیں مردمانی کھولاں ھمدردی درشان کرتگ ءُ زوریں بیگواھیانی بگیری ءَ وتی زھرشانی یاداشت کرتگ ءُ پہ بیگواھیں مردمانی آجوئی ءَ لوٹ کرتگ۔
مرچی زوربیگواھیں جھانزیب مھمد ھسنی ءِ مات ءُ گھار گدان ءَ اتکگ اَنت ءُ زھرشانی یاداشت کرتگ ءُ گوشتگ کہ ھمے 3 مئی ءَ جھازیب مھمد ھسنی ءِ زوریں بیگواھی ءَ دوازدہ سال سرجم بوتگ۔
کھول ءِ گوشگ اِنت کہ اے دوازہ سالانی میان ءَ یکشل ءَ آمیدگس، کمیشن ءُ جتائیں سرکارانی دروازگ ٹک اتگ ءُ زھرشانی ھم کرتگ۔ بلے بژن اِنت کہ چونیں ھم ادارھے ءَ ڈیھ ءِ کانودءِ رد ءَ انساپ دیگ ءَ وتی کرد پیلو نہ کرتگ۔
وی بی ایم پی ءِ چیئرمین نسر اللہ بلوچ ءَ تران کرتگ ءُ گوشتگ کہ زور بیگواھیں مردمانی کھول چہ سالاں پہ وتی آزیزانی آجوئی ءَ آئین ءِ رد ءَ پر ایمنیں جھد کنگ ءَ اَنت۔ آیانی لوٹ ھمیش اِنت کہ مئے آزیزا دیم ءَ آرگ ءُ کانود ءَ رد ءَ انساپ دیگ بہ بنت۔
آئی ءَ گوں سرکار ءُ ڈیھءِ ادارھانی سروکاں لوٹ کرتگ کہ اے جیڑہ ءِ سر ءَ گوں سنگینی ءَ گامگیج زورگ بہ بیت ءُ جھانزیب مھمد ھسنی ءَ ھوار پہ درسیں مردمانی آجوئی ءَ دلجمی دیگ بہ بیت۔ پہ زوریں بیگواھیانی ھلاسی ءَ ڈیھ ءِ کانود ءِ رد ءَ گامگیج زورگ بہ بیت۔
بنشون: درشان اکس: وی بی ایم پی
