زور بیگواھیں استاد واھد کمبر ءِ جنک شاری واھد کمبر ءَ وتی درشانے ءَ گوشتگ کہ منی پت ءِ لوٹ مرچی آمیدگس ءَ ھلاس کرتگ۔ آمیدگس ءَ وتی پیسلہ لھتیں تکنیکی نکاتانی بنیاد ءَ کرتگ۔ بزاں پہ چونیں مردمے ءِ آجوئی ءَ لوٹ ءِ مول بیگواہ یا درکانودی بندیگیں مردمے ءِ آمیدگس ءَ پیش کنگ اِنت۔
آئی ءَ گوشتگ کہ درسیں سرکاری ادارہ ءُ ٹولیاں آمیدگسءَ گوشتگ کہ واھد کمبر بندیگ نہ اِنت۔ من سدکاں کہ منی پت پاکستانی پوج ءِ کر ءَ درکانودی بندیگ اِنت۔ اے سکا بژنی ءُ در الاکی گپے کہ وتی کِر ءَ بندیگ بوگ ءِ منگ ءَ ابید آمیدگس ءَ منگ بوگ ءَ نہ اِنت۔
شاری وھد کمبر ءَ گوشتگ کہ اے جاور پہ کانود ءُ انسانی ھکاں جنجال ودی کنت۔ اگاں ریاست یکشل ءَ آئی دزگیری ءَ مہ من ایت گڑا پہ آئی جانسلامتی ءَ ترس ودی بیت۔ پسو نہ دیگ ءِ سوب ءَ گوں آئی ھرچی بوت کنت۔ چہ لوٹ ءِ ھلاس کنگ ءَ پد پہ منی پت ءِ انسانی شرپ، پھریزگ ءُ جست ءُ پرس ءِ ھک ءَ ترس ودی بیت۔
آئیءَ گوشتگ کہ چہ لوٹ ءِ ھلاس کنگ ءَ پد من پہ وتی پت ءَ سکا پریشان آں۔ من گوں لس مھلوک، سیول سوسائٹی ءُ انسانی ھکانی گلاں لوٹ کن آں کہ اے ناھکی ءِ بگیری ءَ توار چست بہ کن اَنت ءُ پہ منی پت ءِ آجوئی ءَ لوٹ بہ کن اَنت۔چہ اے بے تواری ءَ انسانی ھکانی لگتمالی گیش بیت۔
بنشون: درشان اکس: رسانکدر
