چہ گنداواہ ءَ پاکستانی پوج ءِ دست ءَ زور بیگواھیں پھد ھسین ءِ پت میر سئید لاشاری ءَ وتی زھگ ءِ آجوئی ءِ لوٹ کرتگ۔
آئی ءَ گوشتگ کہ 21 اپریل ءَ روچ ءِ دو ءَ پاکستانی پوج ءَ چہ گنداواہ شھر ءَ منی زھگ پھد ھسین بلوچ آوار جتگ ءُ بیگواہ کرتگ۔ گوں پوج ءَ چیریں ادارہ ءُ سی ٹی ڈی ھم گوں بوتگ۔ آیاں بے میار ءَ گوں توپک ءِ زور ءَ منی زھگ آوار جتگ ءُ گوں وت برتگ۔
آئی ءَ گوشتگ کہ اے رنج ءَ ھما کھول سرپد بہ بیت کہ آ اے رنج ءِ تہ ءَ گوستگ۔ مرچی بلوچستان ءَ ھزارانی کچ ءَ ماس ءُ گھار ھمے رنجانی تہ ءَ زند گوازینگ ءَ اَنت۔
میر سئید لاشاری ءَ گوشتگ کہ من پہ وتی زھگ ءِ ایپ آئی آر ءِ نبشتہ کنگ ءَ پولیس ءِ کِر ءَ شتگ آں آئی ءَ ایپ آئی آر نبشتہ نہ کرتگ۔ مارا انچوش گمان بوگ ءَ اِنت کہ ما چہ انساپ ءَ زبھر بوگ ءَ ایں۔
آئی ءَ گوں درسیں بھرگاں لوٹ کرتگ ءُ گوشتگ کہ اے زوراکیانی بگیری ءَ مئے گون ءَ توار چست بہ کن اِت۔
بنشون: درشان اکس: رسانکدر
