بلوچ یکجھتی کمیٹی ءَ وتی درشانے ءَ گوشتگ کہ امران تاج ء مھمد تاج کہ آئی امر بیست ءُ شش سال اِنت سری کلگ گورکوپ ءِ جاہ منند اِنت۔ تُربَت یونیورسٹی ءِ آئی بی ایل سی بھرگ ءِ نودربرے بوتگ۔27 جون 2025 ءَ وانگ ءَ پد آ چہ یونیورسٹی ءَ درکپتگ ءُ وتی گس ءَ آپسر، مولد ءِ ریک ءَ روگ ءَ بوتگ کہ چہ راہ ءَ دو ءُ نیم ءَ پاکستانی پوج ءُ چیریں ادارھانی کارمنداں آوار جتگ۔
آئی ءَ گوشتگ کہ 27 پروری 2026 ءَ آئی لاش چہ تربت ءِ کیچ کئور ءَ دزکپتگ لاش ءِ سر ءَ آزارانی ٹپ گندگ بوتگ اَنت۔ اے ویل ءَ آئی کھول ءُ سرجمیں بلوچ مھلوک دلپدرد کرتگ۔
بلوچ یکجھتی کمیٹی ءَ اے ناھکی گوں ترندیں دانکاں ایر جتگ ءُ گوشتگ کہ ما گوں میان استمانی انسانی ھکانی ادارہ، اکوام متھدہ ءَ لوٹ کن ایں کہ آ بلوچستان ءَ برجاھیں زوراکیانی بگیری ءَ زوت دلگوش بدے اَنت۔پہ بلوچانی ھکاں توار چست بہ کن اَنت ءُ پہ انساپ، پھازداری ءُ انسانی شرپ ءَ دلجمی بہ دے اَنت۔
آئی ءَ گوشتگ کہ ما اے گپ ءَ تچک کن ایں کہ بلوچ مھلوک ءَ زندگی، پھریزگ ءُ انساپ ءِ ھک ھست۔ چونیں ھم کھولے ترس، گم ءُ رنجانی تہ ءَ زند گوازینگ ءَ لاچار کنگ مہ بیت۔ مئے جھد پہ کینگداری ءَ نہ اِنت، بلکیں پہ وتی مردمانی شرپ ءُ انسانی ھکاں اِنت۔
بنشون: درشان. اکس: بی وائی سی پوسٹر
