بلوچ نیشنل موومنٹ ( بی این ایم ) ءِ مردمی ھکانی ادارہ پانک ءَ مئی 2025 ءِ رپورٹ شنگ کرتگ ، ایشی ءِ تہ ءَ بلوچستان ءِ مردمی ھکانی جاور درشان کنگ بیتگ۔ اے رپورٹ بلوچستان ءَ چہ بازیں دھکاں برجاھیں مردمی ھکانی جاور ءِ تہ ءَ بے تاھیرکنوکیں کچے ءَ بدتری پش دار ایت۔
پانک ءَ دست کپتگیں رپورٹانی رد ءَ بلوچستان ءَ مئی 2025 ءَ پاکستانی لشکر ءَ 128 کس زور بیگواہ ، 27 در آمیدگسی کشتگ۔چہ درساں گیش 32 کس چہ گوادر ءَ زور بیگواہ کنگ بیتگ۔ چہ ایشی ءَ پد چہ کیچ ءَ 27 ، چہ کراچی ءَ 10 ، چہ آواران ءَ 9 ، چہ شال ءَ 8 ، چہ پنجگور ءُ مستونگ ءَ 7 ، چہ چاگے ءَ 5 ، چہ ڈیرہ بگٹی ءَ 4 ، چہ نوشکے ءَ 6 ، موسی کیل ، کلات ءُ ھزدار ءَ 3 ، بارکان ، ھرنائی ءَ 2 ءُ چہ واشک ءَ یک مردمے زور بیگواہ کنگ بیتگ۔
در آمیدگسی کوشانی رد ءَ ھم مئی ءِ ماہ چہ درساں بدتر بوتگ۔27 کس پاکستانی پوج ءُ گوں آئی ءَ ھمگرنچیں ادارہ ، پاکستان ءِ داشتگیں مردم کشیں رمباں کشتگ۔1 مئی ءَ پنجگور ءِ ھند تسپ ءَ سمیر اھمد دزگیری ءَ پد زور بیگواہ کنگ بیتگ ءُ 9 مئی ءَ آئی ءِ کنٹ دست کپتگ۔5 مئی ءَ 15 سالی ئیں الی ، پاکستانی مردم کشیں رمب ءَ ماں تمپ ، کیچ ءَ کشتگ۔ 10 مئی ءَ وھید چہ پنجگور ءَ آوار جنگ بیتگ ءُ دومی روچ ءَ آئی ءِ تیرسپتگیں کنٹ دست کپتگ۔
سوپی تارک چہ گوادر ءِ ھند جیمڑی ءَ آوار جنگ ءَ پد کشگ بیتگ ، پھد لھڑی ءِ کنٹ 13 مئی ءَ چہ شال ءَ دست کپتگ۔2014 ءَ زور بیگواہ کنگ بیتگیں مھمد رمزان ءِ کنٹ ھم مئی ءَ دست کپتگ۔ یونس ماں مالار ، آواران ءَ کشگ بیتگ ، بکتیار اھمد کلات ءَ ھما وھد ءَ نشانگ کنگ ءُ کشگ بیتگ کہ پاکستانی لشکر ءِ کارپدانی بگیری ءَ زھرشانی ئِے کرتگ۔
ساجد ، یاسر ، ھنیپ ازیز ، ابدلتیپ ءُ گوس بکش چہ آیانی لوگاں آوار جنگ ءَ پد کشگ بیتگ اَنت۔ اھوالکار ابدالتیپ ماں آئی ءِ گس ءَ واب ءِ تہ ءَ کشگ بیتگ ، چہ ایشی ءَ زانگ بیت کہ ماں بلوچستان ءَ رسانک ھم جیڑھانی دیمپان اِنت۔مئی ءَ سئے کس — ابدرھمان بزدار ، پرید بزدار ءُ سلتان مری — پولیس ءِ ناشرکاری ءِ گر ءُ دار ءِ تک ( سی ٹی ڈی ) ءَ آوار جتگ اَنت ءُ رند ءَ ماں بارکان ءَ دروگیں میڑے ءَ کشت اَنت۔
26 ءُ 27 مئی ءَ مچی ، مالار ، آواران ءَ لشکر کشی ءِ میان ءَ نئیم ءُ ھوری کشگ بیتگ اَنت ءُ دگہ جنینے سکا ٹپی بیتگ۔ 22 مئی ءَ شیرخان کیتران چہ بارکان ءَ دزگیر اش کرتگ ءُ آئی ءِ کنٹ 28 مئی ءَ دست کپتگ۔درمان دو بر ءَ دزگیر کنگ بیتگ ءُ گڈی رند ءَ آئی ءِ کنٹ 30 مئی ءَ چہ جاھو ءَ دست کپتگ۔ 29 مئی ءَ آپسر، تربت ءَ ’مساپر ‘ نامیں گاڑی رانندگے ( ڈرائیور ) کشگ بیتگ ، ھمے روچ ءَ نزر ، ابدالزیز ءُ 30 مئی ءَ لیویز کارمند سگیر اھمد کشگ بیتگ اَنت۔
پانک ءِ گزارش ءَ گْوشگ بیتگ کہ چہ درسیں ویلاں ھمے زانگ بیت کہ بلوچستان ءَ ریاستی ادارہ ءُ آئی ءِ پلہ مرزی ءَ سلاہ بندیں رمب گوں بے مھاری ءَ شھرمنند ، کارکن ، نودربر ، اھوالکار ءُ سرکاری کارمنداں نشانگ کنگ ءَ اَنت۔اے ویل ناں ایوک ءَ راھبندانی سکا سک بگیری اَنت بلکیں مچگانیں ڈند ( اجتماعی سزا ) ، ترس ءِ چاگرد ءُ زور بیگواھی ءِ برجاہ دارگ ءِ دْرچ اَنت۔چہ میان راج ءَ لوٹ کنگ بیت کہ آ اے تْرام اتگ ءُ ترسناکیں مردمی ھکانی بگیریانی سر ءَ زیت دلگوش بہ کنت ءُ بلوچستان ءِ بزگیں مردمانی مزدانک دیگ ءَ وتی کرد ءَ پیلو بہ کنت۔
