بلوچ نیشنل موومنٹ ( بی این ایم ) ءِ چیئرمین ڈاکٹر نسیم بلوچ ءَ وتی شنگ کرتگیں درشانے ءَ گوشتگ کہ من ماما کدیر ءِ بیرانی ھال ءِ اش کنگ ءَ دلپدرد بوت آں۔ آ بلوچستان ءِ گھگیری، اوپار ءُ انسانی ھکانی یکشلیں جھد ءِ چیدگ اِنت۔ داں شانزدہ سالاں آئی وتی شدکشیں زھرشانی گدان برجاہ داشتگ ءُ وتی زاتی واھشت پہ زوریں بیگواھی ءُ ریاستی زوراکیانی بگیری ءَ جھد ءَ ببا داتگ اَنت۔
آئی گوشتگ کہ ماما کدیر کم چہ کم 2500 کلومیٹر ءِ دراجشکیں پیادگیں روانک ءَ چہ شال ءَ کراچی ءُ چہ کراچی ءَ پد ءَ اسلام آباد ءَ شتگ۔ آئی ءَ جھان توار جتگ ءُ ھزارانی کچ ءَ زور بیگواھیں بلوچ کھولانی رنج پیش داشتگ اَنت۔ چہ پیرانسری، نادراھی ءُ یکشلیں ریاستی زوراکیاں ابید پدکنز نہ بوتگ ءُ زور بیگواھیں مردمانی کھول یل نہ داتگ اَنت۔
ڈاکٹر نسیم بلوچ ءَ گوشتگ کہ آئی بیرانی پہ بلوچ راج، انساپ، شرپ ءُ پہ انسانی ھکاں توار چست کنوکاں یک گرانیں دردے۔ ماما کدیر تھنا گوں لبزاں ستک شانی ندر کنگ مہ بیت بلکیں آئی جھد مھکم دارگی اِنت۔ نوں مئے درسانی زمہ واری اِنت کہ آئی کاروان ءَ برجاہ بہ دار ایں، پہ زوریں بیگواھیانی بگیری ءَ توار چست بہ کن این ءُ گوں انساپ لوٹوکیں کھولاں بہ اوشت ایں۔
بی این ایم ءِ چیئرمین ءَ گوشتگ کہ ھدا آئی ارواہ ءَ آسودگ بہ کنت ءُ آئی جھد برجاہ بہ بیت۔
