لندن ءَ برتانیہ پارلیمنٹ ءَ بلوچستان ءَانسانی ھکانی لگتمالیانی سر ءَ بژن درشان کنگ ءُ یک کراردادے ھم پیش کنگ بیتگ۔ اے کرار داد پارلیمانی سیشن ءِ میان ءَ لیبر پارٹی ءِ پارلیمنٹ ءِ باسک جان میک ڈونلڈ ءَ 3 نومبر 2025 ءَ پیش کرتگ، چہ ایشی ءَ پد لیبرل ڈیموکریٹس ءِ باسک پارلیمنٹ اینڈ ریوجارج ءَ 4 نومبر 2025 ءَ پلہ مرزی ءَ دز رند ھم داتگ۔
کرار داد ءَ ایوان زیریں ءَ بلوچستان ءِانوگیں انسانی ھکانی لگتمالیانی سر ءَ بژن درشان کرتگ ءُ گوشتگ کہ 28 اکتوبر 2025 ءِ شپ ءَ پنجگور ءَ پاکستانی پوج ءَ شپی مھمد ءِ گس ءَ بیڑ برتگ ءُ آئی لوگبانک ءُ جنک نازیہ شپی آوار جتگ ءُ آزار داتگ اَنت۔ چہ ھمے سوب ءَ نازیہ شپی ٹپانی درد اوپار نہ کرتگ ءُ بیران بیتگ۔
آئیءَ گوشتگ کہ ھمے روچ ءَ شال ءِ نزیکیں ھند چلتن ءَ کوہ ءَ یک بزری ارشے کنگ بیتگ کہ اود ءَ شش ورنا ٹپی بیتگ ۔ رپورٹ ءِ رد ءَ اے مردم پہ پکنک ءَ شتگ اَنت۔ کرار داد ءَ ھمے گوشگ بیتگ کہ اے ھال چہ بی بی سی ءَ شنگ بیتگ۔
کرار داد ءَ دیم ءَ 5 اکتوبر 2025 ءَ زھری ءَ بیتگیں بمبگواری ءِ گپ جنگ بیتگ کہ اود ءَ شش لس شھری کشگ بیتگ کہ آیانی تہ ءَ چار زھگ ھوار اَنت ءُ دگہ سے مردم ٹپی بیتگ۔
کرار داد ءَ درسیں مردمانی بگیریءَ زوراکی ایر جنگ بیتگ اَنتءُ اے میان ءَ بیتگیں ویلانی بابت ءَ پٹ ءُ پول کنگ ءِ لوٹ کنگ بیتگ۔
چوش کہ چہ ایشیءَ پیش بلوچ نیشنل موومنٹ ( بی این ایم ) ءِ یک ٹولی یے لھتیں روچ ءَ پیش برتانیہ ءِ پارلیمنٹ ءَ شتگ اَت ءُ اود ءَ گوں پارلیمنٹ ءِ باسک جان میک ڈونلڈ ءَ گند ءُ نند کرتگ ءُ آئی ءَ بلوچستان ءَ انسانی ھکانی لگتمالیانی بابت ءَ سرپد کرتگ اَت۔
زرمبش ٹی وی ءِ جھگیر جاسم بلوچ ھم گوں جان میک ڈونلڈ ءَ گند ءُ نند کرتگ اَت ءُ چہ زرمبش ٹی وی ءِ نیمگ ءَ گوں آئی ءَ گپ ءُ تران ءِ رپورٹےھم شنگ کنگ بیتگ اَت۔
اے کرار دادءَِ سر ءَ داں انوں برتانیہ ءِ پارلیمنٹ ءِ دو باسکاں دز رند ھم داتگ۔
