ایمنسٹی انٹرنیشنل ءَ نامداریں انسانی ھکانی کارکن ءُ وکیل ایمان مزاری ءُ ھادی الی چٹہ ءِ دزگیری ءِ سر ءَ بژن درشان کرتگ ءُ گوشتگ کہ آیانی دزگیری پاکستان سرکار ءِ نیمگ ءَ انسانی ھکانی کارکن ءُ وکیلانی بگیری ءَ برجائیں آمیدگسی ترسینگ ءُ زوراکی ءِ گیش کنگ اِنت۔
آئی گوشتگ کہ ایمان مزاری ءُ ھادی الی چٹہ ھما وھد ءَ دزگیر کنگ بوتگ اَنت کہ آ یک کیسے ءَ آمیدگس ءَ روگ ءَ بوتگ اَنت۔ کارمنداں آیانی دزگیری ءِ وھد ءَ زور کارمرز کرتگ۔ آیانی دزگیری ءِ سوب گوشگ نہ بوتگ کہ چہ ایشی ءَ دوئیں وکیلانی سلامتی ءِ درگت ءَ ترس ودی بوتگ۔
آئی گوشتگ کہ ایمنسٹی انٹرنیشنل آیانی اے پیمیں دزگیری ءَ کانودی رویشت ءِ تچکیں بگیری ءُ سرکار ءِ نیمگ ءَ دروگ، وتسر ءُ بیرگیریں کیسانی یکشل ءَ کار گرگ ءِ سر ءَ بژنیگ اِنت۔ اے کیس تچک ءَ ایمان مزاری ءُ ھادی الی چٹہ ءَ پہ آیانی انسانی ھکاں کار کنگ ءِ پژدر ءَ سزا دیگ ءِ جھدے۔
ایمنسٹی انٹرنیشنل ءَ گوشتگ کہ انسانی ھکانی پھازوکانی پہ زانت ترسینگ ءُ بیھار دیگ زوت بند کنگ بہ بیت۔
آئی گوں پاکستان سرکار ءَ لوٹ کرتگ کہ ایمان مزاری ءُ ھادی الی چٹہ زوت یل کنگ بہ بنت۔ انسانی ھکانی پھازگ ءِ سوب ءَ آیانی بگیری ءَ جنگ بوتگیں درسیں بھتام ھلاس کنگ بہ بنت۔ انسانی ھکانی وکیل ءُ کارکناں چہ ترس ءَ ابید آیاں کار کنگ ءِ موکل دیگ بہ بیت ءُ پہ آیانی پھازداری ءَ دلجمی دیگ بہ بیت۔
