بلوچ یکجھتی کمیٹی ءَ ماں چاگردی رسانکدر ایکس ءَ تونسہ شریپ ءَ پولیس ءِ زوراکیانی پژدر ءَ نبشتہ کرتگ کہ تونسہ شریپ ءِ یونین کونسل پزلہ ءِ سرکماش مھمد اسلم ءُ آئی زھگ ءُ رسول بکش سھب ءِ ھشت ءَ دزگیر کنگ بوتگ اَنت ءُ چیریں بندیگجاھے ءَ دیم دیگ بوتگ اَنت۔
آئی گوشتگ کہ کلمہ چاراہ تونسہ شریپ ءَ پولیس بازیں کچے ءَ مچ بوتگ اَنت آیانی مول روانک ءِ پلہ مرزی ءَ آھوکیں مردمانی پرایمنیں زھرشانی ءِ بے سوب کنگ اِنت۔
آئی ءَ گوشتگ کہ ما ریاست ءِ نیمگ ءَ بلوچانی گون ءَ درمردمی رویشت ءَ ایر جن ایں ءُ دزگیر کرتگیں مردمانی زوت یل کنگ ءِ لوٹ ءَ کن ایں۔ مردم چہ پر ایمنیں زھرشانی ءَ زبھر کنگ نہ لوٹ اَنت۔
اے درگت ءَ بلوچ یکجھتی کمیٹی تونسہ شریپ ءَ گوشتگ کہ کلمہ چاراہ پولیس ءُ چیریں ادارھانی کارمنداں انگر کرتگ، کجام مردم کہ چاراہ ءِ نزیک ءَ کیت آیانی سر ءَ شک بہ بنت گڑا آوار جن اَنت ءُ گاڑیاں سوار کن اَنت۔
آئی ءَ گوشتگ کہ اے وھد ءَ ھشت ءُ دہ مردم چہ کلمہ چاراہ ءَ آوار جنگ بوتگ۔ توپک ءِ زور ءَ مردمانی چہ زھرشانی ءَ دارگ درکانودی کارے۔
