شال: بلوچ یکجھتی کمیٹی کمیٹی ءِ سروک ڈاکٹر ماہ رنگ بلوچ، سبگت اللہ شاہ جی، بیبرگ بلوچ، گلزادی بلوچ ءُ بیبو بلوچ آمیدگس ءَ پیش کنگ ءَ پد پہ دگہ پانزدہ روچ ءَ پولیس ءِ دست ءَ دیگ بیتگ۔
اے بابت ءَ بی وائی سی ءِ سروک ڈاکٹر ماہ رنگ بلوچ ءِ گوشگ اِنت مارا یک ادارے ءَ گیش اِنت کہ ما اد ءَودار کنگ ءَ ایں بلے انگت ءَ ھمےپیسلہ کنگ بیتگ کہ آ پیسر ءَ گوشگ بیتگ اَنت۔
آئی ءِ گوشگ اِنت ما مرچی اد ءَ انساپ ءِ جنگ ءَ مڑگ ءَ ایں بلے چہ ڈن ءَ مئے سنگتانی زوریں بیگواھی ءِ گپ پیداک اَنت۔ چوش کہ نزر مری اِنت کہ مئے زرمبشت ءِ کارکنے آ 25 اگست ءَ آوار جنگ ءُ زور بیگواہ کنگ بیتگ ۔ ما وتی درسیں بیگواھیں مردمانی آجوئی ءِ لوٹ ءَ کن ایں۔
ڈاکٹر ماہ رنگ بلوچ ءَ گوشتگ کہ اگاں پاکستان ءَ آئین، کانود ءُ پارلیمنٹ نامیں چیز ھست گڑا چہ درساں پیش بلوچ چکچنی ءَ ھلاس بہ کنت۔ زوریں بیگواھی ءَمیارے بہ لیک اَنت ءُ اے آمیدگس جوڑ کنگ بیتگ اَنت اد ءَ کانود گوں راستی ءَ پیش کنگ بہ بیت۔ اد ءَ جج ءُ وکیل نشتگ اَنت آیاں آجوئی دیگ بہ بیت دانکہ آ انسانی کانود ءِ ھاب ءَ پیسلہ بہ کن اَنت۔
آئی ءَ گوشتگ کہ مئے جھد برجاہ بیت ءُ ما وتی مردمان ءَ ھمے گوش ایں کہ شما ھمک زوراکی ءَ گوں پرایمنیں گھگیری ءَ دیم پہ دیمی بہ کن اِت۔
چوش کہ بی وائی وائی سی ءِ سروکانی ناھک ءَ بندیگی ءَ پد ششمی رند اِنت کہ پد ماں پد ءَ پہ ریمانڈ ءَ پولیس ءِ دست ءَ بوگ ءَ اَنت، بلے اے میان ءَ چہ سرکار ءِ نیمگ ءَ یک بھتامے ھم راست نہ بیتگ۔
پہ بلوچ یکجھتی کمیٹی ءِ سروکانی ناھکیں زندانی کنگ ءُ زور بیگواھیں مردمانی آجوئی ءَ اسلام آباد ءَ گوستگیں پنجاہ ءُ ھشت روچ اِنت کہ زھرشانی نندانک برجاہ اِنت۔
