کراچی: پہ بیگواھیں مردمانی آجوئی ءَ کراچی پریس کلب ءِ دیم ءَ برجاھیں زھرشانی گدان ءَ 35 روچ سرجم بوتگ۔ ھور ءِ گوارگ ءَ ابید کھول گدان ءَ ساڑی اَنت ءُ پہ وتی آزیزانآزیزانی آجوئی توار چست کنگ ءَ اَنت۔
چہ زھرشانی گدان ءَ بیگواھیں زاھد بلوچ ءِ پت ءَ تران کرتگ ءُ گوشتگ کہ من بازیں نادراھیاں ابید زھرشانی کنگ ءَ لاچار آں۔من جگر ءِ نادراھے آں منی زھگ ءِ بیگواھی ءَ منی نادراھی گیش کرتگ۔
آئی گوشتگ کہ منی زھگ ءَ انوں کراچی زانشجاہ ءَ انٹرنیشنل ریلیشنز ءَ گریجویشن کرتگ۔ کار ءِ نہ رسگ ءِ سوب ءَ رکشہ چلائینتگ ءُ گس والینتگ۔
آئی گوشتگ کہ منی زھگ جپا کشیں ورنایے کہ آ وتی کھول ءِ والینوک اِنت بلے مرچی آ ھم پُلگ بوتگ۔ اگاں آئی سر ءَ چونیں بھتامے ھست آمیدگس ءَ پیش کنگ بہ بیت۔
انسانی ھکانی کارکناں گوشتگ کہ چہ کراچی ءِ جتاھیں ھنداں بیگواھیں باز بلوچ ورنا بیگواہ اِنت۔ آیانی تہ ءَ ماری پور ءُ لال بکھر ھاکس ءِ جھمنندیں شیراز بلوچ، سیلان بلوچ، سرپراز بلوچ، رمیز بلوچ، رھیم بکش بلوچ ءُ رھمان بلوچ ھوار اِنت
زھرشانی گدان ءَ نشتگیں مردماں گوں ریاستی ادارھاں لوٹ کرتگ کہ آ بیگواھیں مردماں زور دیم ءَ بیار اَنت دانکہ کھول چہ اے درد ءُ جنجالاں بہ رک اَنت۔
