بلوچ آجوئی لوٹکیں سروک رھیم بلوچ ایڈوکیٹ ءَ وتی شنگ کرتگیں درشانے ءَ شھید نواب اکبر ھان بگٹی ءُ آئی سنگتانی نوزدھمی شھیدی سالروچ ءِ درگت ءَ آ ستک شانی ندر کرتگ ءُ گوشتگ کہ شھید نواب اکبر ھان بگٹی راجی گوستانک ءِ یک درے۔ آئی ءَپاکستان ءِ پوج ءُ آئی جرنیلاں انچیں پنتے داتگ کہ آ کدی ھم بیھال نہ کن انت۔ بلکیں یک ترسے گوں آیانی واباں بندوک اِنت۔
آئی گوشتگ کہ شھید نواب اکبر ھان بگٹی یک کسانیں مدتے ءَ بلوچ آجوئی ءِ گھگیری ءِ پڑا زورگریں ریاست پاکستان ءِ بگیری ءَ یک توانمندیں مٹے جوڑ بوگ ءَ جوانیں کردے پیلو کرتگ۔ مرچی بلوچ راجی زرمبشت ھما کچ ءَ توانمند اِنت ءُ روچ پہ روچ گیش توانمند بوگ ءِ گندگ ءَ ھمک بلوچ پہ راجی آجوئی گرگ ءَ مزنیں اوستے دارگ لوٹ ایت۔ آجوئیءِ شھیدانی دیمونی زوال نہ بنت۔
