شال: پاکستانی پوج ءِ دست ءَ زور بیگواھیں پروپیسر ڈاکٹر اسمان کازی ءِ زورگپتگیں منگی تامربند ماں رسانکدر شنگ کنگ بیتگ۔
چہ زورگتپیں تامربند ءَ آ وت ءَ گوں بلوچ آجوئی لوٹوکیں سلاہ بندیں گل بی ایل اے ءَ ھمگرنچ کنگ ءُ مجید برگیڈ ءِ کمکارے پیش کنگ ءَ اِنت۔ مجید برگیڈ ءِ پدائی ارشانی کمکار ءُ بی ایل اے ءِ سلاہ بندیں کاروائیانی کمکار پیش کنگ ءَ اِنت۔
پروپیسر ڈاکٹر اسمان کازی کیچ ءِ جاہ منند اِنت ءُ گوں وتی برات جبران بلوچ ءَ پاکستانی پوج ءَ 12 اگست ءَ چہ شال ءِ ھند اپنان ٹاون ءَ آوار جتگ ءُ بیگواہ کرتگ اَت۔ ڈاکٹر اسمان کازی ءِ زوریں بیگواھی بازیں انسانی ھکانی دارھاں ایر جتگ اَت۔
چوش کہ چہ ریاستی ادارھانی نیمگ ءَ پروپیسر ڈاکٹر اسمان کازی ءِ زور گپتیں منگی تامربند اولی نہ اِنت چہ ایشی ءَ پیش بیگواھیں بلوچ جنین ماھل بلوچ ءُ دلجان بلوچ ءَ ھوار دگہ بازیں مردمانی تامربند پہ زور گرگ ءُ شنگ کنگ بیتگ اَنت دانکہ آ بلوچ سلاہ بندیں گلانی سر ءَ بھتام بہ جن اَنت ءُ زوریں بیگواھی ءِ جیڑہ ءَ شکی بہ کن اَنت۔
