پاکستانی لشکر ءِ دست ءَ بلوچ چکچینی ءُ دروگیں میڑانی بگیری ءَ بلوچ راجی زْرمبشت ( بی این ایم ) ءَ ماں جرمنی ءَ زھرشانی کرتگ ۔اے زھرشانی بی این ایم جرمنی ءِ این آر ڈبلیو بنزہ ءِ نیمگ ءَ ٹریر رائن پیلیٹنیٹ ءَ کنگ بیتگ۔
اے دم ءُ درگت ءَ بی این ایم جرمنی تک ءِ کارگشاد جبار ءَ گْوشتگ ما بلوچ ءِ چکچینی ، بلوچستان ءَ مردمی اگبال ءُ دروگیں میڑانی بگیری ءَ زھرشانی کنگ ءَ این ءُ چہ میان استمان ءَ ماں بلوچستان ءَ پاکستان ءِ جنگی میارانی بگیری ءَ کارروائی کنگ ءِ لوٹ کن ایں۔
آئی ءَ چد ءُ دیم گْوشتگ راجانی سنت بلوچستان ءَ ھم روچ برجاھیں مردمی اگبالانی لگتمالیانی سر ءَ پٹ ءُ پول کنائینگ ءَ پترے دیم بہ دنت۔
این آر ڈبلیو بنزہ ءِ کارگشاد بادل ءَ گْوشتگ پاکستانی لشکر پولیس ءِ ناشرکاری گر ءُ دار ءِ تک ( سی ٹی ڈی ) ءُ مردم کشیں رمب ءِ پارست ءَ مردمی اگبالاں لگتمال کنگ ءَ اِنت۔
آئی ءَ گْوشتگ میان استمان اے دروگیں میڑانی سر ءَ دلگوش گْور بہ کنت۔ پاکستانی واکدارں زور دیگ بہ بیت کہ آ ناپتیں رنگے ءَ پٹ ءُ پول بہ کن اَنت ءُ زمہ واراں جست ءُ پرس بہ کن اَنت۔انچیں کارے بہ بیت کہ آمیدگس سھرائیں وڑے ءَ پاکستانی لشکر ءِ ناروائیں کارانی سر ءَ آمیدگری بہ کن اَنت چہ ایشی ءَ ما چہ اے بے تاھیر کنوکیں ویلاں ودی بیوکیں گلگاں دور کرت کن این ءُ باندات ءَ اے رنگیں ویلانی دارگ ءِ اوست داشت کن ایں۔
بلوچ راجی زْرمبشت ( بی این ایم ) ءِ باسک سپیہ منزور ءَ گْوشتگ ، بلوچستان ءَ زور بیگواھیانی بے شماریں ویل دیم ءَ اتکگ۔گچینی بلوچ راج ءِ اگبالانی پانک جنوکیں باسک ، اھوالکار ءُ دگہ مردم نشانگ کنگ بیتگ اَنت۔ چہ ایشاں گیشتریں مردم چہ آیانی کھولاں سندگ ءُ بے نام ءُ نشانیں جاھاں زندانی کنگ بہ اَنت۔گوں ایشاں ناراھی کنگ بیت ءُ کھول ءِ مردماں پیش دارگ نہ بہ اَنت۔
آئی ءَ وتی گپانی تہ ءَ گْوشتگ زور بیگواھیانی سان تیوک ءَ ھما مردمانی نہ سر ءَ نہ کپ اَنت کہ زور بیگواہ کنگ بہ اَنت۔ لوگ ءِ مردم چہ رنج ءُ درداں سربار اَنت۔ وتی زور بیگواھیں مردمانی بارہ ءَ نہ زان اَنت ءُ مدام ترس ءِ تہ ءَ زند گوازینگ ءَ اَنت۔ مردمی اگبال پانکانی کوشست اِنت کہ اے زور بیگواھی آسر بہ بہ اَنت ءُ ایشانی زمہ واراں جست ءُ پرس کنگ بہ بیت۔
آسپ ءَ گوں بھرزیروکاں تْران کنان ءَ گْوشتگ ما اد ءَ پاکستانی لشکر ءِ دست ءَ بلوچانی چکچینی، مردمی اگبالانی لگتمالی ءُ شھرمنندانی دروگیں میڑاں کوش ءِ بگیری ءَ پرایمنیں زھرشانی کنگ ءَ اِنت ءُ گوں زور بیگواھیں مردم ءُ آیانی کھولاں ھمدردی ءِ درشان کنگ ءَ ایں۔
کاسم ءَ بلوچستان ءِ گْوستانکی پژدر ءَ گپ جنان ءَ گْوشتگ 27 مارچ 1948 ءَ بلوچستان ءَ زور گرگ ءُ پاکستان ءَ ھوار کنگ ءَ پد پاکستانی واکدار بلوچستان ءَ نوک آبادی یے سرپد بہ اَنت ءُ پاکستانی لشکر بلوچستان ءِ مردمانی زیردست کنگ ءَ زوراکی کنگ ءَ اِنت۔ مروچی ، گوں ھرچ تک ءُ پھناتاں سیادی داروکیں ھزاراں بلوچ کسے کہ نودربرے ، استادے، ڈاکٹرے یا مردمی اگبالانی پانکجنے زور بیگواھی ءِ آماچ اَنت ءُ آ پاکستان ءِ لشکر ءِ چیریں زندانانی تہ ءَ سالانی سال اِنت کہ آزارانی دیمپان اَنت۔ آیانی میار ایوک ءَ ایش اِنت کہ آیاں ناروائیانی بگیری ءَ توار چست کرتگ ءُ راجمستری راھبنداں بنکی مردمی اگبالانی لوٹ کرتگ اَت۔ آجوئی راجمستریں چاگرد ءَ ھمک مردم ءِ بیتکی اگبال اِنت۔ بلے پاکستان راجمستری ءِ دودانی پاسداری ءَ بے سوب بیتگ۔ میان استمانی راھبنداں بے کچ ءُ شمار یکشل ءَ لگتمال کنگ ءَ اِنت ءُ مردمی جاناں ھچ مان نہ یار ایت۔
بلوچ راجی زْرمبشت ءِ باسک سادک سئید ءَ وتی تْران ءَ بلوچستان ءَ مردمی اگبالانی بگیری ، زور بیگواھی ءُ در آمیدگسی کوشانی سر ءَ گپ جتگ ، آئی ءَ گْوشتگ ما چہ راجانی سنت ءُ یورپی سنت ءِ پجیگ ءَ مردمی اگبالانی درسیں گلاں دزبندی کن ایں کہ آ پاکستان ءِ بگیری ءَ کارروائی بہ کن اَنت۔ پاکستانی لشکر مردماں زور بیگواہ کنگ ءَ اِنت۔ مئے مردماں دروگیں میڑاں کشگ ءَ اِنت ءُ آ چہ گپ ءُ درشان ءِ آجوئیءَ زبھر کنگ بیتگ اَنت۔
ھبیب ءَ گْوشتگ ، بلوچستان ءَ مھترھند چہ بازیں دھکاں چکچینی کنگ ءَ اِنت۔ 2009 ءَ مئے راھشون شھمیر گلام مھمد ءُ آئی ءِ ھمراھانی کنٹ چگل دیگ بیتگ اَنت ءُ گوں ھمیشی ءَ اے چکچینی ءِ تہ ءَ ’ بہ کش ءُ چگل دے ‘ ءِ شوندات گیش کنگ بوت ، رند ءَ سدانی سیاسی کارکن درآمیدگسی کشگ بیتگ اَنت۔
آئی ءَ چد ءُ دیم گْوشتگ ، بلوچستان ءَ برجاھیں چکچینی ءِ سر ءَ میان استمانی بے تواری ءَ پاکستانی لشکر ءُ دگہ واکداراں تْرام اتگیں رنگے ءَ بلوچ چکچینی ءِ گیشتر کنگ ءِ ھمت داتگ۔
اھمد ءَ زور بیگواہ ءُ دروگیں میڑاں کوش بیتگیں کھولانی بارہ ءَ گپ جنان ءَ گْوشتگ وھدے اے کھول رو اَنت مزدانک ءِ لوٹ کن اَنت گڑا آیانی توار گوش دارگ نہ بہ اَنت بلکیں پاکستانی واکدار آیاں گوں لٹاں مان بند اَنت۔ سارتیں شپاں آیانی سر ءَ گوں آپ گواریں توپاں آپ پر ریچگ بیتگ۔ زور بیگواھیں مردمانی کھول وتی زند ءِ گیشتریں وھد دگانی سر ءَ زھرشانی ءَ گوازینگ ءَ اَنت۔ بلے اے بدیں کار چہ اد ءَ دارگ نہ بہ اَنت ، بلکیں آ زور بیگواھیں مردماں دروگیں میڑاں کشگ ءُ آیاں ناشرکار پیش دارگ ءَ اَنت۔
