کراچی: پاکستانی چیریں ادارھانی دست ءَ بیگواہ کرتگیں زاھد بلوچ ءِ کھول ءِ زھرشانی ءَ دوازدہ روچ سرجم بیتگ کہ کراچی پریس کلب ءِ دیم ءَ برجاہ اِنت۔جتاجتائیں بھرگاں سیادی داروکیں مردم پہ ھمدردری درشان کنگ ءَ گدان ءَ پیداک اَنت۔
آئی کھول ءِ گوشگ اِنت کہ زاھدا بلوچ ءِ زوریں بیگواھی ءَ سی ءُ یک روچ سرجم بیتگ کہ آئی بابت ءَ مارا ھچ وڑیں سرپدی دیگ نہ بیتگ۔ ما مدام ھمے لوٹ ءَ کنگ ءَ ایں اگاں زاھد بلوچ ءِ سر ءَ چونیں ھم بھتامے ھست گڑا آمیدگس ءَ پیش کنگ بہ بیت۔
کھول ءِ گوشگ اِنت کہ مئے زھرشانی ءَ دہ روچ ءَ گیش اِنت چہ سرکار ءِ نیمگ ءَ پہ مئے لوٹانی منگ ءَ ھچ وڑیں دلجمیں گامگیج زوور نہ بیتگ۔ دانکہ زاھد بلوچ آجو نہ بیتگ مئے زھرشانی برجاہ بیت۔
آئی ءَ گوں انسانی ھکانی گل، رسانکدر، آمیدگس ءُ انساپ دوستیں مردماں لوٹ کرتگ کہ پہ زاھد بلوچ ءِ زوتیں آجوئی ءَ توار چست بہ کن اِت۔
