شال: وائس پار بلوچ مسنگ پرسنز (وی بی ایم پی) ءَ وتی درشانے ءَ گوشتگ کہ بی ایس او پجار ءِ بنجاھی وائس چیرمین بابل ملک بلوچ ءِ براس نسار اھمد ءُ کھول ءِ آدگہ مردم گوں گل ءِ چیرمین نسراللہ بلوچ ءُ ھوران بلوچ ءَ گند ءُ نند ءَ گدان ءَ آتکگ اَنت۔
آئی گوشتگ کہ بابل ملک ءِ بیگواھی ءِ درگت ءَ گپ ءُ تران کرتگ ءُ چہ گل ءِ نیمگ ءَ آئی کیس ءِ سر ءَ دیمروئی کنگ ءُ بابل ملک ءِ بیگواھی بابت ءَ گیشیں سرپدی یکجاہ کرتگ اَنت۔
وی بی ایم پی ءِ چیرمین نسراللہ بلوچ ءُ ھوران بلوچ ءَ کھول دلجمی داتگ کہ بابل ملک بلوچ ءِ کیس ءَ پہ بیگواھیں مردماں جوڑ کنگ بوتگیں کمیشن اسلام آباد، بلوچستان سرکار، دمگی چیرمین ءُ ڈپٹی رجسٹرار ءَ سر کنگ بنت۔
آئی گوشتگ کہ پہ بابل ملک بلوچ ءِ آجوئی ءَ ھمک پورم ءَ توار چست کنگ بیت ءُ آئی کھول تھنا یل کنگ نہ بیت۔
بنشون: درشان اکس: وی بی ایم پی
