شال ءَ چہ وائس پار بلوچ مسنگ پرسنز ءِ زھرشانی گدان ءَ وی بی ایم پی ءِ چیئرمین نسر اللہ بلوچ ءُ کارگشاد ھوران بلوچ ءَ بی ایس او پجارءِ وائس چیئرمین بابل ملک ءِ زوریں بیگواھی ءِ بگیریءَ پریس کانپرنس کرتگ ءُ گوشتگ کہ بابل ملک ءَ پاکستانی پوج ءَ چہ شال ءَ پولی ٹیکنک کالج ءِ ھاسٹل ءَ آوار جتگ ءُ بیگواہ کرتگ۔ انگت ءَ نہ آئی دزگیری ءِ سوب گوشگ بوگ ءَ اِنت ءُ نہ آئی سلامتی ءِ بابت ءَ ھال دیگ ءَ اَنت۔ اے آئین، کانود ءُ انسانی ھکانی بگیری اِنت۔
آئی ءَ گوشتگ کہ بابل ملک یک نودربر سروکے ءُ آئی جمھوری رد ءَ پہ نودربرانی ھکاں توار چست کرتگ۔ آئی آوار جنی جمھوری ءُ پرایمنیں توار ءِ دارگ ءِ کوشست اِنت ایشی ما ھچ وڑ ءَ نہ من ایں۔
نسراللہ بلوچ ءَ گوں سرکار ءَ لوٹ کرتگ کہ بابل ملک ءَ ھوار درسیں بیگواھیں مردم زوت دیم ءَ آرگ بہ بنت ءُ اگاں کسے ءِ سر ءَ چونیں بھتامے ھست گڑا کانود ءِ رد ءَ آمیدگس ءَ پیش کنگ بہ بیت۔ اگاں نہ گڑا وی بی ایم پی گوں نودربر گلاں ھوار زھرشانی کنت۔
آئی ءَ گوشتگ کہ ھمے سال ءِ بنداتی ماھاں دو سد ءَ گیش بلوچ بیگواہ کنگ بوتگ کہ آ جتائیں بھرگانی مردم اَنت۔ بلوچستان ءِ جتائیں ھنداں ھوار چہ کراچی ءُ پنجاپ ءَ زور بیگواہ کنگ بوتگ اَنت، آیانی تہ ءَ زالبول ھم ھوار اِنت۔ بازیں بیگواھیں مردم کشگ ءُ آیانی لاش جنگلاں چگل دیگ بوتگ اَنت۔
نسراللہ بلوچ ءَ پریس کانپرنس ءِ گڈی ءَ گوں درسیں سیاسی پارٹی، نودربر گل ءُ سیول سوسائٹی ءَ لوٹ کرتگ کہ آ زوریں بیگواھیانی بگیری ءَ توار چست بہ کن اَنت۔
بنشون: پریس کانپرنس اکس: وی بی ایم پی
