سند: چه شھکور ءَ سرکار ءِ نیمگ ءَ شش جو ءِ جوڑ کنگ ءُ پنجاپ ءَ آپ برگ ءِ بگیری ءَ سند ءِ جتائیں ھنداں ششمی روچ ءَ زهرشانی برجاه بیتگ۔
بنشون ءِ رد ءَ برجاھیں زھرشانی ءَ سند ءِ راجدوستیں گلاں ھوار وکیل، سیاسی ءُ چاگردی کارکن ءُ لس مردماں بھر زرتگ. زھرشانیانی سوب ءَ سند، پنجاپ ءِ سیمسر سرجم ءَ بند اِنت۔
ھمے وڑ ءَ سند ءِ جتائیں ھند کموں شھید ، دیرا موڑ ، ببرلو ءُ آدگه ھنداں زھرشانی برجاه بیتگ اَنت، زھرشانیانی سوب ءَ بازیں کچے ءَ اشکر بروکیں ٹرالر ماندارگ بیتگ ءُ کراچی ءِ بندن ءُ تھرکول شوربندی ءِ دگ ھم بند کنگ بیتگ اَنت. چه ایشی ءَ اَبید کراچی ، سکر ، ھیدرآباد ، نوابشاه ءُ آدگه جتائیں شھراں زھرشانی روانک کشگ بیتگ.
زھرشانی کنوکانی گوشگ اِنت که سند ءِ شھکور ءَ سرکار ءِ آپ ءِ برگ سند ءِ چہ آپ ءَ زبھر کنگ اِنت ، اِے نه ایوک ءَ ڈیھ ءِ راھبندانی بگیری اِنت بلکیں سند ءِ کِشار، اَبرم ءُ ھند ءِ کار ءُ بارانی تباھی ءِ درچ اِنت.
دومی نیمگ ءَ ببرلو ءَ وکیلانی گل ءَ گوں سرکار ءَ گپ ءُ تران ءَ پد وکیلانی پتر ءِ گل جوڑ کنگ بیتگ، گل ءِ گوشگ اِنت که دانکه سرکار ءِ سند کور ءَ آپ ءِ شوربندی بند کنگ ءُ چه لشکری شرکتاں کِشت ءُ کشار ءِ موکل پچ گِرگ نه بیت سند ءُ پنجاپ ءِ سیمسر بند کنگ بیت.
ھمے درگت ءَ بلوچستان نیشنل پارٹی ءِ سروک سردار اکتر مینگل بلوچ ، پشتون تھپز موومنٹ ءِ سروک منزور پشتین ءُ سرائیکی سروک راشد ازیز بٹا ءَ سند ءِ لس مردمانی زھرشانی ءِ پله مرزی ءِ جار جتگ.
زھرشانی کنوکاں گوشتگ که سند ءِ مڈیانی سر ءَ ھچ وڑیں زورگری ءُ سودا ءَ نه من اِین ءُ اِے زھرشانی داں ھما وھد ءَ که سند کور ءِ شوربندی ءُ لشکری شرکت بند کنگ به بنت برجاه بنت.
