پنجگور/ شال : زورگریں پاکستانی لشکر ءَ بیڑ برتگ ءُ سے مردم آوار جنگ ءَ پد بیگواه کرتگ.
اھوالکار ءِ رد ءَ گوستگیں روچ ءَ پاکستانی لشکر ءَ چه پنجگور ءِ ھند پروم ، ریش بازار ءَ دو مردم یوسپ ابدین ءُ اکرام اپزل آوار جتگ ءُ بیگواه کرتگ اَنت.
اکرام اپزل دو ماه پیش ھم پاکستانی لشکر ءَ گوں دگه چار ورنا ءِ ھواری ءَ چه کراچی ءَ آوار جتگ ءُ چه بازیں آزار دیگ ءَ پد یل کرتگ اَت وھدیکه گوستگیں روچ ءَ یکبرے پد ءَ آوار جنگ بیتگ.
دومی نیمگ ءَ پاکستانی لشکر ءِ کارمنداں نوزده پروری ءِ شپ ءَ شال ءَ براھوئی زبان ءِ گشنده ازگر کمبرانی ءِ گس ءَ بیڑ برتگ ءُ آ آوار جنگ ءَ پد بیگواه کرتگ. کھول ءَ آئی ءِ زوریں بیگواھی ءِ گپ راست کرتگ ءُ په آئی آجوئی ءَ توار چست کنگ ءِ لوٹ کرتگ۔
ھمے وڑ ءَ مرچی پاکستانی لشکر ءَ چہ تمپ، بالیچہ ءِ دوراھی ءَ تائپ ء تارک نامیں ورنایے آوار جتگ ءُ بیگواہ کرتگ۔ بیگواھیں تائپ کلاھو ءِ جاہ منند اِنت کہ کراچی ءَ پہ درمان کنگ ءَ روگ ءَ بیتگ۔
