کیچ: بلوچ یکجھتی کمیٹی ءِ نیمگ ءَ گوادر ءَ بیوکیں راجی مچی ءِ درگت ءَ ھیرونک ءُ سامی ءَ دیوال نبیسی، پنتانک بھر ءُ بانگ کنگ ءُ گوں مردماں دیوان کنگ بوتگ۔ بی وائی سیءِ باسک جتا جتائیں میتگاں شتگ اَنت ءُ مردم اِش مچ کرتگ اَنت ءُ گوادر مچی ءِ باروا سرپدی داتگ اَنت۔
گوں مردماں آیاں تران کرتگ ءُ گوشتگ کہ بی وائی سی ءِ نیمگ ءَ بیست ءُ ھشت جولائیءَ گوادر ءَ مچی یے برجم دارگ بوگ ءَ اِنت اے مچی ءِ مول ریاست ءِ زوراکیانی دیم ءَ آرگ اِنت۔ چوش کہ پہ آدگہ راجاں لاش ءِ دزکپگ مزنیں گپے بلے پہ بلوچاں ھمک روچ لاشانی چست کنگ آئی زندمان ءِ بھرے جوڑبوتگ۔ مئے راج ھمک روچ وتی ورنایانی لاشاں کوپگ ءَ اِنت۔
آئی ءَ گوشتگ کہ اے مچی بلوچ راج ءَ یکجاہ کنت ءُ جھان ءَ ھمے پیش دار ایت ریاست پاکستان وت یک ناشرکارے ھمک روچ بلوچانی گساں بیڑ بارت ءُ ماتانی بچ ءُ گھارانی براتاں چہ گساں آوار جنت ءُ بارت بیگواہ کنت۔ ھمک وھد ءَ بلوچ چکچینی بوگ ءَ اِنت۔
آئی ءَ گوشتگ کہ ریاست بہ لوٹ ایت آ دگاں شر کرت کنت بلے ما ھمک وھد ءَ گندگ ءَ ایں چہ اے دگ ویلاں چنچو بلوچ بیران بوگ ءَ اَنت۔ چہ ھمے دگ ویلانی سوب ءَ چل مردم ھم یکجاہ ءَبیران بوتگ اَنت۔ بلے اے درسیں چیزاں سرکار ھم گند ایت ءُ انگت ءَ اے دگاں شر نہ کنت کہ اے ھند بلوچستان اِنت آئی ءَ بلوچ ءِ تاوان بوگ ءِ ھچ پرواہ نیست۔
