تربت: لھتیں روچ پیش چہ میری ءَ پاکستانی لشکر ءِ دست ءَ زور بیگواہ کنگ بوتگیں سگیر سجاد ءِکھول ءَ آئی یل نہ کنگ ءِ بگیری ءَ ڈی بلوچ ءَ زھرشانی کرتگ ءُ سی پیک دگ بند کرتگ۔ زھرشانی ءَسیاسی کارکن ءُ لس مردماں بازیں کچے ءَ بھر زرتگ۔
زور بیگواھیں سگیر سجاد زمباد گاڑی ءِ ڈرائیورے ءُ لھتیں روچ پیش چہ گس ءَ آئی براس کدیر سجاد ءِ ھواری ءَ آوار جنگ بوتگ کہ سجاد لھتیں دماناں پد کدیر آجو بوتگ ءُ سگیر انگت بیگواہ اِنت۔
سگیر ءِ زوریں بیگواھی ءِ بگیری ءَ چہ ایشی پیش ھم کھول ءَ یک رندے زھرشانی کرتگ ءُ پد چہ واکدار ءِ دلجمی دیگ ءَ پد دگ پچ کنگ بوتگ۔
کھول ءِ گوشگ اِنت کہ واکدار پہ سگیر ءِ آجوئی ءَ وتی کھولاں پیلو کنگ ءَ نہ اِنت پمیشکا ما لاچار بوتگ ایں ءُ مرچی زھرشانی کنگ ءَ ایں دانکہ سگیر یل کنگ نہ بوتگ ما وتی زھرشانی ءَ برجاہ دار ایں۔
