بلوچ یکجھتی کمیٹی ءَ وتی شنگ کرتگیں درشانےءَ گوشتگ کہ 12 اپریل 2026 ءَ ھزدار ءِ ھند نال ءِ جاہ منند ءُ ایپ ایس سی ءِ نودربر مھراج ء اللہ بکش چہ شال ءِ گرین پلازہ، چالڈرن نادراھجاہ ءِ نزیک ءَ شپ ءِ ھشت ءَسی ٹی ڈی ءَ آوار جتگءُ بیگواہ کرتگ۔
آئی ءَ گوشتگ کہ چہ ایشی ءَ پیش مھراج ایپ آئی آر ءِ رد ءَ پولیس ءَ دزگیر کرتگ۔ مانزمانی ءَابید تھری ایم پی او ءِ رد ءَ گوں بی وائی سی ءِ سروکاں بند کنگ بوتگ ءُ پد ءَ 20 اپریل 2025 ءَ یل کنگ بوتگ۔ چہ کانودی لوٹانی پیلو کنگ ءُ آمیدگس ءَ پیش کنگ ءَ ابید آ دو بر بیگواہ کنگ بوتگ۔
آئی ءَ گوشتگ کہ 23 اپریل ءَ ھدہ زندان ءَ جست ءُپرس ءِ میانءَ ڈاکٹر ماہ رنگ بلوچ ءُ بی وائی سیءِ آدگہ سروکاں زھرشانی کرتگ اَت ءُ مھراج بلوچ ءِ آمیدگس ءَ پیش کنگ ءِ لوٹ کرتگ اَت۔ وکیلاں ھم لوٹ ءِ پلہ مرزی کرتگءُ چہ ججءَ لوٹ کرتگ کہ سرکار ءَ زور بہ دے اَنت زوریں بیگواھی ءِ درچ ھلاس کنگ بہ بیت۔
بی وائی سی ءَ گوشتگ کہ اے ویل ھمے تھلیں راستیءَ پیش دارایت کہ کانود ءِ پاسداری کنوک ءُ آمیدگس ءَ پیش بیوکیں مردم ھم پھریز نہ اَنت۔ مھراج ءَ ھچ میار نیست، آئی سر ءَ ھچ وڑیں بھتام نیست بلے آ آزار جاھے ءَ بند اِنت ءُ بی وائی سی ءِ سروک ھم بندیگ اَنت۔
آئی ءَ گوں بلوچ مھلوک ءَ لوٹ کرتگ کہ آ ھوار بہ بنت ءُ پر ایمنیں زھرشانیاں بھر بزور اَنت ءُ پہ نزوریناں توار چست بہ کن اَنت۔
بی وائی سیءَ گوں میان استمانی انسانی ھکانی گلاں لوٹ کرتگ کہ آ دلگوش ءَ گور بہ کن اَنت ءُ بلوچستان ءِ جاورانی گر ءُ دار ءَ وتی کرد ءَ پیلو بہ کن اَنت۔
بنشون: درشان اکس: مونوگرام
