شال: پہ زور بیگواھیں مردمانی پد جنگ ءَ شدکشیں زھرشانی گدان ءَ 5422 روچ سرجم بوتگ۔ یک شمبے ءِ روچ ءَ چہ مستونگ ءَ سیاسی ءُ چاگردی کارکن ابدالھی، زھیر، نزیر ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ مردمی ھک ءُ پہ سرڈگار ءِ دیمپانی ءَ توار چست ءِ بیر ءَ مردم زور بیگواہ ءُ آزارانی دیمپان کنگ بوگ ءَ اَنت اے درچ گوں ترندی ءَ برجاہ اِنت۔ پاکستان ریاست میان استمانی مردمی ھکانی راھبند ءِ لپاشگ ءَ کمیں ھم ملامت نہ بیت۔
ماما کدیر گوشتگ کہ بلوچ ورنایانی لاشانی چگل دیگ ءُ زوریں بیگواھی ءِ درچ ھمک روچ تیز بوگ ءَ اِنت۔ بلوچستان ءِ چنچو دمگانی تہ ءَ ناشرکاری وتی گڈی سیمسر ءَ سر اِنت۔ گوستگیں ماہ ءَ بازیں کچے ءَ آبادیانی سر ءَ بیڑ برتگ ءُ نہ تیوک ءَ چادر ءُ چاردیوالی لگتمال کرتگ اَنت بلکیں ھندی مردماں ءَ ترسینتگ ءُ چہ گساں سھر ءُ گرانھادیں سامان ھم لٹ ءُ پل کرتگ اَنت۔
آئی ءَ گوشتگ کہ یک نیمگے ءَ لاش کپگ ءُ زھرشانی بوگ ءَ اِنت بلے سرکار زوریں بیگواھی ءُ لاشانی دور دیگ ءَ ھلاس نہ کنت۔ بلکیں اے شوربندی پاکستانی لشکر ءِ پدریں زوراکیانی بے سوبیں چیر دیگ ءِ جھد اِنت۔
ماما کدیر گوشتگ کہ راستی ھمیش اِنت چیریں ادارہ اے زوراکیاں پہ بلوچ چکچینی ءَ گیشتر گوں تیزی ءَ برجاہ دارگ لوٹ ایت دانکہ آ پہ وتی نپ ءُ باپاریاں جنگ ءَ برجاہ بدار ایت ءُ اے سرڈگار ءَ گوں دوئیں دستاں لٹ ءُ پل بہ کنت۔
