شال: پہ زور بیگواھں مردمانی پدجنگ ءَ شدکشیں زھرشانی گدان ءَ 5448 روچ سرجم بوتگ۔ چارشمبے ءِ روچ ءَ سیول سوسائٹی ءِ باسکاں ھوار آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ اکوام متھدہ ءِ نیمگ ءَ زوریں بیگواھیانی باروا باز کرار داد پیش کنگ بوتگ آیانی رد ءَ زور یں بیگواھی سکا مزنیں جیڑھے لیکگ بوتگ ءُ اکوام متھدہ ءِ راھبند ءِ رد ءَ مردمی ھکانی بگیری اِنت۔ زوریں بیگواھی نہ تیوک ءَ میارباری یے بلکیں رستری کارے ءُ ھچ وڑ ءَ اوپار کنگ نہ بیت۔
ماماکدیر گوشتگ کہ دو می نیمگ ءَ پاکستان جھان ءَ بلیک میل کنگ ءُ بلوچ چکچینی کنگ ءَ اِنت۔ بلوچستان ءَ پاکستانی چیرہ ادارہ ھمک روچ بلوچ پسگاں آوار جنگ ءَ پد گنتریں آزار دیگ ءُ شھید کنگ ءَ اِنت لاشاں جنگلاں چگل دیگ ءَ اِنت۔ چہ 2001 ءَ داں انوں ھزارانی کچ ءَ بلوچ پسگ پاکستانی لشکر ءَ چہ بازار، مساپر گاڑی ءُ وانگجاھاں آوار جتگ ءَ بیگواہ کرتگ اَنت۔ آیانی تہ ءَ بازیں کچے ءَ جنین ءُ زھگ، کماش ھم ھوار اَنت۔ چہ 2001 داں انوں زور بیگواھیں مردمانی لاش چہ بلوچستان ءِ جتائیں ھند ءُ دمگاں دزکپتگ ءَاَنت۔
آئی ءَ گوشتگ کہ اگاں اکوام متھدہ راستے پٹ ءُپول کنگ لوٹ ایت گڑا پاکستان سرکار ءِ پندلاں دلگوش مہ دنت ءُ وت گوں زور بیگواھیں مردمانی کھولاں گند ءُ نند بہ کنت۔
