وائس پار بلوچ مسنگ پرسنز (وی بی ایم پی) ءَ وتی درشان ءَ سمینہ بلوچ ءُ کمبر بلوچ ءِ زوریں بیگواھی ءِ سر ءَ بژن درشان کرتگ ءُ آئی زوتیں آجوئی ءِ لوٹ کرتگ ءُ گوشتگ کہ گل ءَ اے ھال سر بوتگ نال ءِ ھند ءَ استکلی ءُ اورناچ ءَ کمبر بلوچ ء ابدلتیپ ءُ سمینہ بلوچ ء دست مھمد ءَ پاکستانی پوج ءَ آوار جتگ ءُ بیگواہ کرتگ۔
آئی گوشتگ کہ آیانی کھول ءِ گوشگ اِنت کہ دوئیں مردم انگت آمیدگس ءَ پیش کنگ نہ بوتگ اَنت ءُ نہ کہ آیانی بابت ءَ کھولاں سرپدی دیگ بوتگ کہ کھول بازیں جنجالانی دیمپان اَنت۔
وی بی ایم پی ءَ گوشتگ کہ چونیں ھم شھری یے ءَ ابید چہ ارزی ءَ دزگیر کنگ ءُ آ چیریں جاھاں بندیگ کنگ ءُ کھولاں سرپدی نہ دیگ نہ تھنا راھبند ءِ بلکیں انسانی ھکانی گنتریں لگتمالی اِنت۔ گل ءَ اے گامگیج ءَ درکانودی لیک ایت کہ اے وڑیں گامگیج کانود ءَ نزور کنت۔
آئی گوشتگ کہ زالبولانی بیگواھی یک سکا ترسناکیں جیڑھے کہ چاگرد ءُ انسانی شرپ ءِ بگیری اِنت۔ ایشی سر ءَ زوت دلگوش دیگ بہ بیت۔
وی بی ایم پی ءَ گوں سرکار ءُ ادارھاں لوٹ کرتگ کہ سمینہ بلوچ ءُ کمبر بلوچ ءِ آجوئی ءَ دلجمی دیگ بہ بیت۔ اگاں آیانی سر ءَ بھتامے ھست گڑا آمیدگس ءَ پیش کنگ بہ بنت ءُ کانودی ھک دیگ بہ بیت۔
وی بی ایم پی ءَ گوشتگ کہ ھمے کول ءَ کن ایں کہ گل زوربیگواھیانی بگیری ءَ وتی پرایمنیں جھد ءَ برجاہ دار ایت ءُ کھولانی توار ءَ ھمک جاہ ءَ چست کنت۔
بنشون: درشان اکس: وی بی ایم پی
