مستونگ: جتائیں ھنداں پاکستانی پوج ءَ لشکر کشی کرتگ ءُ باز مردم آوار جتگ۔
اھوالکار ءِ رد ءَ پاکستانی پوج ءَ مستونگ ءِ ھند کردگاپ ءُ گرگینہ ءَ سَے روچ اِنت کہ لشکر کشی کنگ ءَ اِنت۔ لشکر کشی ءِ میان ءَ پاکستانی پوج ءَ نودربر، زمیندار، استاد ءُ آدگہ سرکاری نوکراں ھوار بیست ءَ گیش مردم آوار جتگ ءُ بیگواہ کرتگ۔
بنشون ءِ رد ءَ زوربیگواھیں مردماں لھتیں مردمانی نام پرویز سرپرہ ء مھمد وارس، ابدالرسول ء ابدالباکی سرپرہ ،بابو سپر ھان ء سکندر ھان سرپرہ، ابدلجبار ء سکندر ھان سرپرہ، زبیر سرپرہ ء ابدالمجید ،زیشان ء تما ھان سرپرہ ، نکیب اللہ ء ھاجی الی اھمد سرپرہ ، مھب اللہ ء ابدالباکی سرپرہ ءُ ھسنین اِنت کہ چہ کردگاپ ءَ بیگواہ کنگ بوتگ اَنت ءُ چہ کلی رودینی ءَ لیویز رسالدار ھان مھمد رودینی ءُ آئی برات ایپ سی ءِ کارمند گلام ربانی آوار جتگ اَنت۔ ھمے وڑ ءَ چہ گرگینہ ءَ دو برات گوس بکش سرپرہ ءُ ساجد بیگواہ کنگ بوتگ اَنت۔
چہ ایشی ءَ ابید لھتیں روچ پیش کردگاپ ءِ جھمنندیں سَے برات اکتیار اھمد ، مکتیار اھمد ءُ گلام سرور ء میجر درمھمد سرپرہ چہ شال ءَ آوار جنگ ءُ بیگواہ کنگ بوتگ اَنت۔
ھندی مردمانی گوشگ اِنت لشکر کشی ءَ پاکستانی پوج ءَ کوھاں پہ دیم تیرگواری کرتگ ءُ گولا آس داتگ کہ چہ ایشی ءَ باز دلوت تاوان بوتگ۔ کردگاپ ءَ پوج ءَ زمیندارانی سولر تیرگواری کرتگ ءُ تاوان داتگ اَنت۔
اھوالکار اکس: اھوالکار
