بلوچ لبریشن آرمی ( بی ایل اے ) ءِ جارکش آزاد بلوچ ءَ وتی شنگ کرتگیں درشانے ءَ گوشتگ کہ منگچر گورگی ءَ باجگراں چہ پشت ءَ ارش کرتگ ءُ گل ءِ چار سنگت شھید بیتگ، پسھی کاروائی ءَ چاگردی سلکاریاں ھواریں دو ناشرکار مرتگ ءُ آیانی شاکر نامیں سروکے ٹپی بیتگ۔
آئی ءَ گوشتگ کہ باز وھد بیت بی ایل اے ءَ ھمے گپ سر بیتگ کہ شاکر ھمے ھند ءِ مردمانی چہ گاڑیاں زر گرگ ءَ ابید بے میار ءَ مردماں دلسیاہ کنگ ءَ بیتگ۔ ھمے گپانی پژدر ءَ بی ایل اے ءِ سرمچار گوں شاکر ءَ گپ کنگ ءَ شتگ اَنت ءُ سرمچار اود ءَ سر بیتگ اَنت کہ آیاں شاکر ءِ دو مردم دزگیر کرتگ ءُ شاکر لوٹ اتگ، گس ءِ جنیناں کرآن زرتگ ءُ سرمچارانی دیم ءَ ایر کرتگ کہ آیاں یل بہ کن اِت۔ گڑا بی ایل اے ءِ سرمچاراں ھمے سدکی داتگ کہ آ تھنا اے وھد ءَ گوں شاکر ءَ گپ کنگ لوٹ اَنت ءُ پہ آیانی کڈن کنگ ءَ اتکگ ایں آ ھندی مردماں دلسیاہ مہ کنت۔
جارکش ءَ گوشتگ کہ شاکر اود ءَ سر بیتگ سرمچاراں گپ جتگ ءُ گوشتگ کہ اد ءَ مردم گلہ کنگ ءَ اَنت شما آیاں دلسیاہ کنگ ءَ اِت ءُ چہ ھندی گاڑیاں باجگری لوٹگ ءَ اِت، وتی اے کار ءَ یل بہ کن اِت۔ چہ سرمچارانی گپانی گوش دارگ ءَ پد آئی گوشتگ کہ دگہ بر ءَ چوش نہ کن آں۔ وھدے کہ سرمچار در کپتگ اَنت گڑا شاکر گوں وتی ھمراھاں سرمچارانی سر ءَ تیرگواری کرتگ۔
آئی ءَ گوشتگ کہ چہ تیرگواری ءَ بی ایل اے ءِ چار سنگت گل ھان پنام یاسین، سنگت انایت اللہ پنام ھاپز، سنگت ازت اللہ پنام سئید، سنگت شئے مراد پنام سلام شھید بیتگ اَنت۔ بی ایل اے ءِ اے چاریں شھیدیں سنگت 2023 ءَ گل ءَ ھوار بیتگ اَنت ءُ داں شھیدی ءَ گوں نہ ترسی ءَ وتی راجی پرز ءِ پیلو کنگ ءَ بیتگ اَنت۔ بی ایل اے چاریں شھیدیں سنگتاں ستک شانی ندر کنت کہ آیاں وتی راجی پرز ءِ پیلو کنگ ءَ وت ءَ شھیدانی لڑا ھوار کرتگ۔
آزاد بلوچ ءَ گوشتگ کہ ھند ءِ درسیں باجگر ءُ چاگردی سلکاریں ھواریں مردماں کڈن کن ایں کہ آ چہ وتی کاراں گستا بہ بنت ءُ مھلوک ءَ دلسیاہ مکن اَنت۔ اگاں نہ بی ایل اے آیاں ھر یکے ءِ ھساب ءَ گیت۔
