بلوچستان ءِ تھی کارانی تک ءِ نیمگ ءَ شنگ بوتگیں نوٹیپکیشن ءِ رد ءَ اے میان ءَ سلاہ زورگ ءُ کارمرز کنگ، رجسٹر نہ بوتگیں گاڑی، سیاہ شیشگیں گاڑی، پنچ مردم ءَ گیش ءِ یکجاھی، مچی، نندانک، زھرشانی، روانک ءِ سر ءَ پابندی اِنت۔
دیمتر ءَ گوشگ بوتگ کہ دیم بند کنگ ءُ ماسک جنگ مہ بیت دانکہ مردم پجارگ بہ بنت۔
بنشون ءِ رد ءَ بلوچستان ءِ بنجاھی شھر شال ءَ ریڈ زون ءِ درسیں دگانی سر ءَ کنٹینر جتگ ءُ دگ بند کنگ بوتگ اَنت ءُ پوج شیوار کنگ بوتگ۔
دگ بند کنگ ءُ شھری کڈن کنگ بوتگ اَنت کہ ابید چہ ھژدری کاراں گساں ڈن در مہ کپ اِت ءُ بازار ءُ ریڈ زون ءِ نیمگ ءَ مہ رو اِت۔
دومی نیمگ ءَ جتائیں شھراں دامگ بند اَنت۔ جتائیں جاھاں انگت بلوچ سرمچارانی ءُ پوج ءِ میان ءَ میڑ برجاہ اَنت۔
