بلوچ یکجھتی کمیٹی ءِسروک ڈاکٹر سبیہ بلوچ ءَ وتی شنگ کرتگیں تامربندے ءَ گوں بلوچ راج ءَ ھوار آدگہ راجاں لوٹ کرتگ کہ آ 25 جنوری ءَ بلوچ چکچینی ءِ یادگاری روچ ءِ درگت ءَ بدار اَنت ءُ بلوچستان ءَ گوں بلوچ مھلوک ءَ برجاھیں ریاستی زوراکیانی بگیری ءَ توار چست بہ کن اَنت۔
آئی گوشتگ کہ مرچی بلوچ ءِ زندمان ھما پیم ءَ اِنت کہ پہ زند گوازینگ ءَ یکشل ءَ جھد درکار اِنت۔ اگاں بلوچستان ءَ جتائیں ھنداں پچارئے گڑا ھمک جاہ ءَ ریاستی زوراکی، انسانی تباھی ءُ بنکی ھکانی لگتمالی گندگ بیت۔
آئی ءَ گوشتگ کہ کوہ ءِ سلیمان ءِ ھنداں شومک ءِ وڑیں نادراھی یے ءِ مردمانی جاناں تاوان دیگ ءَ اِنت۔ کھول پہ وتی یک مردمے ءِ جان ءِ رکینگ ءَ نادرس اَنت۔ بولان ءُ جیکب آباد آبادیں ھند گوشگ بوتگ اَنت اود ءَ مردم شدیگ اَنت۔ اود ءَ چہ شریں وردن ءِ نہ رسگ ءَ ماس، زھگ ماسی ءِ وھد ءَ بیران بوگ ءَ اَنت۔
ڈاکٹر سبیہ بلوچ ءَ گوشتگ کہ مکران ءَ یک نیمگے ءَ تیاب ءُ دومی نیمگ ءَ سیمسر اِنت بلے ریاست بلوچ مھلوک ءِ روزگار ءَ پلگ ءَ اِنت۔ مردم چہ وتی گس ءُ جاہ ءَ گلینگ بوگ ءَ اَنت ءُ گھگیری کنوک کشگ بوگ ءَ اَنت۔
آئی ءَ گوشتگ کہ سراوان ءُ جھلاوان ءَ کشندہ ٹولی تچک ءَ تر ءُ گرد کنگ ءَ اَنت۔ زھگ ءُ زالبولاں زور بیگواہ کنگ ءُ ترسینگ ءَ اَنت۔ اے ھنداں نشہ چہ وردن ءَ گیش پہ ارزانی ءَ دزکپ ایت ءُ چوکی ھمے تباھی ءَ تچک ءَ ھوار اَنت۔
ڈاکٹر سبیہ بلوچ ءَ گوشتگ کہ توتک ءَ دزکپتگیں لاش انگت زانگ نہ بوتگ اَنت کہ کئی اَنت۔ اے راستے کہ آ بلوچ اَنت ءُ آیانی ماس مرچی دگانی سر ءَ پہ وتی آزیزانی آجوئی ءَ زھرشانی کنگ ءَ اَنت۔
آئی گڈسر ءَ گوں سرجمیں جھان ءَ بلوچاں ھوار انسانی ھکانی پد جنوکاں لوٹ کرتگ کہ آ بلوچ چکچینی ءِ بگیری ءَ توار چست بہ کن اَنت۔
