بلوچ اسٹوڈنٹس ایکشن کمیٹیءِ جارکش ءَ وتی شنگ کرتگیں درشانے ءَ گوشتگ کہ شال ءَ شاھوانی اسٹیڈیم ءَ بلوچستان نیشنل پارٹی ءِ نیمگ ءَ برجم داشتگیں مچی ءَ وتکش ارش بلوچستان ءَ سیاسی کارانی سر ءَ برجاھیں زوراکیءُ آزاردھیانی درچ اِنت، سردار اکتر مینگل ءُ بلوچستان نیشنل پارٹی کارکنانی سر ءَ ارش پہ زانت یک پندلے ءُ ایشی مول بلوچستان ءَ پر ایمنیں سیاسی توانمندانی بے توار کنگ ءُ آیانی سیاسی کارانی دارگ اِنت دانکہ بلوچستان ءَ زوراکیں سرکار وتی دلیگاں بہ کنت۔
آئی ءَ گوشتگ کہ واکداریں توانمندانی پندل نوکیں گپ نہ اَنت چہ ایشی ءَ پیش ھم بلوچ سیاسی پارٹیانی سروک ءُ کارکن گوں جتائیں وڑ ءُ پیماں نشانگ کنگ بیتگ اَنت، آیانی نشانگ کنگ ءُ کوش، زوریں بیگواھی، ژانگولیں لاش، پجار نہ بیتگیں مانش ءُ ھمے وڑیں تراک ھوار اَنت کہ اود ءَ ھزارانی کچ ءَ بلوچ پسگانی جان تاوان بیتگ اَنت۔
آئی ءَ گوشتگ کہ چہ ایشی ءَ پیش ھم بلوچ سیاسی کارکنانی درکانودی زندانی کنگ ءُ سیاسی کارانی سر ءَ بندش جنگ بلوچستان ءَدر سیاسی کنگ ءِپندلانی بھر اِنت۔ بلوچستان ءِ سر ءَ زوراکی چہ چنچو دھکاں برجاہ اِنت ءُ ایشی ءَ گوں جتائیں ھیلھاں کار گرگ ءَ اَنت بلے اے کار چہ کس ءَ چیر نہ اَنت کہ اے ناشرکاریانی پشت کئے اِنت۔
آئی ءَ گوشتگ کہ ما اے ویل ءَ گوں ترندیں دانکاں ایر جن این ءُ شھیدانی کھول ءُ سیاسی کارکنانی گون ءَ اوشتاتگ ایں۔
