بلوچ نیشنل موومنٹ ( بی این ایم ) ءِ چئیرمین ڈاکٹر نسیم بلوچ ءَ ماں چاگردی رسانکدر ایکس ءَ نبشتگ کہ اسلام آباد ءَ بلوچ جنینانی گونءَ ریاستی زوراکی برجاہ اِنت ٹینٹ جنگ ءَ نیلگ ءَ اِنت۔
آئی ءَ گوشتگ کہ چہ اسلام آباد ءِ ترندیں ھور ءَ ابید بلوچ ءِ مات ءُ جنک دگانی سر ءَ زھرشانی ءَ نشتگ اَنت ءُ پہ وتی آزیزاں انساپ ءِ لوٹ ءَ کنگ ءَ اَنت کہ آیانی مردم زور بیگواہ کنگ بیتگ اَنت یا دروگیں کیس ءِ رد ءَ بندیگ اَنت۔
ڈاکٹر نسیم بلوچ ءَ گوشتگ کہ زھرشانی کنوکانی لوٹ ھمیش اَنت ریاستی زوریں بیگواھی، درکانودی کوشءُ پولیس ءِ دروگیں میڑاں کوش ھلاس کنگ بہ بنت ءُ میارباریاں ھواریں مردم کانود ءِ رد ءَ جست کنگ بہ بنت۔ اے ھک ھمک شھری ءَ ھست۔ ریاست آیاں بے اوست کنگ ءُ گوں آیاں زوراکی کنگ ءَ اِنت۔
آئی ءَ گوشتگ کہ اسلام آبادپولیس جنین ءُ زھگاں ھور ءِ سر ءَ ٹینٹ جنگ ءَ نیلگ ءَ اِنت، چہ ایشی سوب ءَ آ اے موسم ءَ ھور ءِ سر ءَ نندگ ءَ لاچار اَنت۔ اے کارپد تھنا سر ءَ گوازینگ نہ اِنت بلکیں زوراکی کنگ ءُ گوں رستری رویشت ءَ پیش بوگ اِنت۔ اے انچائیں ویلے نہ اِنت بلکیں انچیں نزامے ءِ چیدگ اِنت کہ زوراکی، زورگپتی ءُ انسانی شرپ ءَ لگتمال کنت۔ ریاستی ادارھانی نیمگ ءَ گوں بلوچاں پیش بیوکیں رویشت اسل ءَ نوکیں نوک آبادی ءِ وڑیں واکداری ءَ پیش دار ایت۔
ڈاکٹر نسیم بلوچ ءَ گوشتگ کہ درسیں زور بیگواھیں مردم آجو کنگ بہ بنت، درکانودی کوشانی بابت ءَ پہ دلجمی پٹ ءُ پول کنگ بہ بیت۔ دروگیں کیساں بندیگیں مردم یل کنگ بہ بنت۔ زھرشانی کنوکانی گون ءَ بیوکیں زوراکیانی بابت ءَ جست گرگ بہ بیت۔
آئی ءَ گوشتگ کہ اے ایردستی اِنت، نوک آبادکاریں زوراکی اِنت، اے داں ھما وھد ءَ برجاہ بیت دانکہ مارا انساپ نہ رستگ ءُ آجو نہ بیتگ ایں۔
