کیچ: تربت ءَ بلوچ یکجھتی کمیٹی ءِ نیمگ ءَ زھرشانی روانکے کشگ بوتگ۔ روانک چہ شھید بالاچ چاراہ ءَ در کپتگ ءُ شھید پدا اھمد چاراہ ءَ مچ بوتگ اَنت۔
زھرشانی ءَ زور بیگواھیں مردمانی کھول، سیاسی ءُ چاگردی کارکن، نودربر، جنین ءُ زھگ ءُ لس مردماں بازیں کچے ءَ بھر زرتگ۔ زھرشانی کنوکیں مردماں شھید بالاچ، زور بیگواھیں مردمانی اکس، بینر ءُ پلے کارڈ دستاں بوتگ اَنت۔
زھرشانی کنوکیں مردماں پاکستانی لشکر ءِ زوراکیانی بگیری ءَ اوگام جتگ ءُ زور بیگواھیں مردمانی آجوئی ءِ لوٹ کرتگ۔
آیاں تران کرتگ ءُ گوشتگ کہ سرجمیں راج ءَ نوں سما کرتگ پاکستان ءِ پارلیمنٹ ءَ نشتگیں مردم ھچ وڑ ءَ بلوچ ءِ دوزواہ نہ اَنت آ مئے مال ءُ مڈیاں برگ ءُ مئے زھگ ءُ براتاں زور بیگواہ کنگ ءَ اَنت۔
آیاں گوشتگ کہ ریاست ءَ اے گپ نزانتگ بالاچ ءُ آئی ھمراھانی ناھکیں کوش پما یک بلاھیں ردی یے بیت۔ بالاچ ءُ آئی ھمراھانی شھیدی ءَ تیوگیں راج پہ گھگیری ءَ پاد کرتگ ءُ یکجاہ کرتگ۔
آیاں گوشتگ کہ اسلام آباد پریس کلب ءِ دیم ءَ برجاھیں زھرشانی نندانک پہ زوریں بیگواھی ءُ دروگیں میڑاں مردمانی ناھکیں کوش ءِ بگیری ءَ برجاہ اِنت بلے سرکار آیانی زھرشانی ءَ مان آرگ ءَ نہ اِنت۔ بلے ریاست چوش نہ زانت اے یک زرمبشتے اے تیوگیں بلوچستان ءِ کنڈ ءَ کنڈ ءَ سر اِنت۔
