بلوچ یکجھتی کمیٹی ( بی وائی سی ) ءِ جارکش ءَ ماں رسانکدر ءَ وتی شنگ کرتگیں درشانے ءَ گوشتگ که ھب ءِ پولیس ءَیک شمبے ءَ بی وائی سی ءِ روانک ءِ سر ءَ زوراکی کنان ءَ تیرگواری کرتگ ءُ باز مردم دزگیر کرتگ.
آئی ءَ گوشتگ که 5 جولائی ءَ ھب چوکی ءَ یک ایمنیں زھرشانی روانکے درکپتگ بلے گوں زوراکی ءَھلاس بیتگ ، پولیس ءَ په روانک ءِ ھلاس کنگ ءَ اناگت ءَ تیرگواری کرتگ ءُ اَرسی گیس جتگ ءُ پنچ مردم درکانودی دزگیر کرتگ ءُ گوں وت ءَ برتگ۔ دزگیر کنگ بیتگیں مردماں چار جنین ھم ھوار اِنت که په وتی آزیزانی آجوئی ءَ توار چست کنگ ءَ بیتگ اَنت۔
بی وائی سی ءَ گوشتگ که پولیس ءَ زوراکی ءِ میان ءَ ھیومن رائٹس کمیشن آف پاکستان ءِ کارکن ابدالله بلوچ ھم دزگیر کرتگ ، آئی ءِ دزگیری ءَ انوں 20 ادار ءَ گیش گوستگ بلے پولیس ءَ اِے بابت ءَ کانودی منانک پیش نه کرتگ. وھدے که آیانی وکیل تانه ءَ شتگ اَنت آیاں موکل دیگ نه بیتگ ءُ واتر بیتگ اَنت ، درسیں بندیگ ابید ءِ راھبندی کاروائی ءَ گڈانی زندان ءَ دیم دیگ بیتگ اَنت۔
آئی ءَ گوشتگ که چه بی وائی سی ءِ نیمگ ءَ پنجگور ءَ گل ءِ کارکن ءُ زوربیگواھیں زھیر بلوچ ءِ کسان سالیں زھگ زیشان زھیر ءِ ناھکیں کوش ءِ بگیری ءَ سرجمیں بلوچستان ءَ زھرشانی برجاه اِنت ، بلے زھرشانی چه پولیس ءِ نیمگ ءَ زوراکی ءِ نشانگ کنگ بیتگ اَنت۔
آئی ءَ گوشتگ کہ چہ ایشی ءَ پیش کراچی ءَ بی وائی سی ءِ روانک ءِ سر ءَ سند پولیس ءَ بیڑبرتگ ءُ سوکیں جنیناں ھوار چار مردم دزگیر کرتگ اَت ءُ رند ءَ یل کنگ بیتگ اَنت۔
بی وائی سی ءَ گوں انسانی ھکانی ادارهاں لوٹ کرتگ که آ بلوچستان ءَ برجاھیں ریاستی زوراکی ءِ بگیری ءَ گامگیج بزور اَنت ءُ سیاسی کارکنانی زھرشانی کنگ ءِ ھک ءِ پله مرزی ءَ به کن اَنت۔
