شال: پہ زوربیگواھیں مردمانی پدجنگ ءَ برجاھیں وی بی ایم پی ءِ زھرشانی گدان ءَ 5847 روچ سرجم بوتگ۔ دوشمبے ءِ روچ ءَ جتائیں بھرگاں سْیادی داروکیں مردم پہ ھمدردی درشان کنگ ءَ گدان ءَ اتکگ اَنت۔
گل ءِ ایگزیکٹو کمیٹی ءِ باسک نیاز نیچاری ءَ ماہ جبین ءِ یل نہ کنگ ایر جتگ ءُ پہ آجوئی ءَ دلجمی کنگ ءِ لوٹ کرتگ۔
آئی گوشتگ کہ بلوچستان ءَ زوربیگواھی ءِ درچ تیز کنگ بوتگ۔ بلوچستان ءِ جتاھیں ھنداں ریاستی ادارھاں مردم درکانودی آوار جنگ ءَ پد بیگواہ کرتگ اَنت ءُ آیانی لاش چہ جنگلاں دزکپگ ءَ اَنت یا آیاں دروگیں میڑ ءَ کشگ ءَ اِنت۔ چہ ایشی سوب ءَ سرجمیں بلوچستان ءِ مردم ترس آماچ اَنت۔ اے پہ ڈیھ ءِ سلامتی ءَ شریں پالے نہ اِنت۔
نیاز نیچاری ءَ چہ سرکار ءَ لوٹ کرتگ کہ ماہ جبین ءَ ھوار پہ درسیں زوربیگواھیں بلوچانی آجوئی ءَ دلجمی بہ دنت ءُ بلوچستان ءَ درکانودی آوارجنی ءُ انسانی ھکانی لگتمالی ءَ بند بہ کنت ءُ گوں سرجمیں بلوچستان ءِ مردماں ڈیھ ءِ رھبند ءِ رد ءَ پیش بہ بیت۔
