بلوچستان نا بنجاہ شال ئٹی سئے شمبے نا دے بلوچ یکجہتی کمیٹی نا کنڈ آن زوراکی نا بیگواہی تا برخلاف شال پریس کلب نا مونا اسہ ریلی ئس کشنگا۔
ریلی ٹی بیگواہ غا بندغ آتا خاہوت و چُنا نیاڑی تا بھلو کچ ئسے آن بیدس خوانندہ آتون اوار جتا فکر ئنا تپہ آتیان تعلقداری تخوکا بندغ آک اوار مسر۔ ریلی ٹی اوار مروکا بلوچ بیگواہ تا عکس آتے دو ٹی ہرفیسہ اوفتا آجوئی نا خواست کننگ اسر۔
برانزیک شار ئنا جتا کسر تیٹ مارچ کریسہ میزان چوک آ مُچ مسر۔
برانزی ریلی تدوکا دے تیٹ خضدار آن پاکستانی لشکر نا دو تیان بیگواہ مروکا جاوید بلوچ، مرتضیٰ زہری، عنایت اللہ زہری تون اوار نوشکی و ایلو عیلاقہ تیٹ مروک زوراکی نا بیگواہی تا برخلاف اڈ تننگا۔
ریلی ٹی اوار مروکا تتون تران کریسہ نیشنل ڈیموکریٹک پارٹی نا ارسلان بلوچ نا پاننگ اس کہ بلوچستان ئٹی برجاء زوراکی نا بیگواہی تا لڑ ئٹی اسہ وار پدا ترندی ہتنگانے۔ مخلوق ءِ ہرفیسہ بیگواہ کننگک و ہرا وخت اوفتا خاہوت آک پیشتمیسہ برانز کیرہ تو اوفتیا دوبہ خلنگک کہ دا ڈن ملکی ایجنسی تیان پیسہ ہلیرہ برانز کیرہ، خاہوت آک عدالت آ کار تو عدالت ئٹی اوفتے پاننگک کہ نُما بیگواہ غا بندغ آک پیشن مُلک آتیا ہنانو۔
