بلوچ یکجہتی کمیٹی اسلام آباد نا کنڈ آن اسلام آباد ئٹ زوراکی نا بیگواہی تیان زیمی مروکا تا جہانی دے آ نیشنل پریس کلب اسلام آباد نا مونا برانز کننگا۔
برانزی تیٹ سیاسی و چاگڑدی باسک آک اوار ئسر۔ ہراڑے برانزیک بلوچ بیگواہ آ بندغ آتا رکھوک یلہ مننگ و دا بے بندغی ڈوہداری تا ایسر کننگ نا خواست ءِ کریر۔
سیاسی و بندغی حق آتا کارندہ افراسیاب خٹک تران کریسہ پارے کہ پاکستان ئٹ اسہ رہبند ئسے نا رد ئٹ زند ءِ گدریفیرہ۔ رہبند ہرا نا تہٹی بندغ آتا حق، چاگڑد نا حق آک اوار ءُ ولے افسوز نا ہیت ئسے کہ پاکستان ئٹی قانود آ عمل متنے دا اسہ پوسکنو ہیت اس اف۔
او پارے کہ کنے یات ءِ 1976 ئٹی، ای نیشنل عوامی پارٹی ٹی اسوٹ۔ 1975 آ نیپ آ پابندی لگا او وخت آ بلوچستان ئٹی کل آن اولیکو بیگواہ آ بندغ ، دلیپ داس ، اونا سنگت اسد مینگل ئس۔
او پارے کہ 1977 ئٹی، ای خیر بخش مری، عطاء اللہ مینگل زندان ئٹی اسون، گڑا ہموڑے ننے پاننگا کہ اسد مینگل زندہ اف۔ و او وخت آن داسکان بیگواہی تا لڑ برجاء ءِ۔
او پارے کہ ای ڈیہہ آتے پنیسہ خنانٹ، ای پاکستان ءِ پنیسہ خنانٹ۔ بنگالی تا زی آ زلم آک سیم ءِ گدریفیر گڑا اوفک بیوس مسر تینکن جتا مننگ نا کسر ءِ ہرفیر۔ او پارے اگہ پاکستان نا عدلیہ، پارلیمنٹ و بست و بند بیوس آتے انصاف تننگ کپک گڑا دانا مطلب اندادے کہ داڑے رہبندی ریاست نا نظام ایسر مسنے و دا دانا مرگ ئنا پڑ ء ۔
افراسیاب پارے کہ متکن آ حکومت پارے کہ "زوراکی ئٹ بندغ آتے بیگواہ کروکا میاری ءُ" نئے بل قومی اسمبلی ٹی پاس کننگا ولے سینٹ آ او بل گم مس۔
او پارے کہ نن اینو بیگواہ مروکا بندغ آتا جہانی دے آ خواست کینہ کہ پاکستان نا ایجنسی تا زی آ و خاص وڑ ئٹ آئی ایس آئی نا برخلاف قانود اس جوڑ کننگ مرے، اوفک بندغ آتے بے قانودی ہرفیرہ۔
او پارے کہ گورنر ہاوس کوئٹہ نا مونا کہ زوراکی ئٹ بیگواہ مروکا بندغ آتا خاہوت آک تولوک ءُ اوفتتون ہم اواری نا درشانی ءِ کینہ و اوفتون اوار سلوک اُن۔ کنے افسوز ءِ کہ بلوچ خوانندہ ورنا تے ٹک کننگ ءُ، لالا فہیم آن بار آ کتاب چھاپ کروکو ورنا ئسے زوراکی ئٹی بیگواہ کننگانے۔
کماش راہشون نا پاننگ ئس کہ نن بلوچ، پشتون و سندھی اسہ وڑ ئسے نا ہم غلامی کننگ کن تیار افن۔ بلوچ، پشتون و سندھی تا نسل کشی بند کننگے۔ ارٹمی قوم آتا شرف کننگتو گڑا نی 1971 والا کسہ ءِ دوارہ لکھنگ مرو۔
