ایران نا 2 زالبول صحافی الناز محمدی ئے چم بازی نا دوبہ ٹی تقریباً اسہ تُو ئس بندی کننگ نا سزا تننگا۔ ایران نا ہندی میڈیا نا رد ئٹ دا سزا مُسہ سال ئنا جزوی پد تموک بندی مننگ نا سزا نا بشخ ئنا وڑ تننگانے۔
الناز محمدی نا ایڑ، الہی، ہرا تینٹ ہم صحافی اسے، پولیس نا دزگیری ٹی 22 سالہ مہسا امینی نا گڈیکو رسم آتا رپورٹنگ آن گڈ ستمبر اِرا ہزار بیست و دو آن بندی ءِ۔
ایلو کنڈ آن فرانسیسی عہدیدار آتا رد ئٹ دو شمبے نا دے پنچ اندنو زالبول فرانس آ سر مسنو ہرا طالبان نا خلیس آن کیہی وار فرانس آ بننگ نا خواست کرینو و دا ہم پارینو کہ فرانس بندغی ہمدڑدی نا بنداو آ اندنو کسر ئس ایتے کہ ہرا زالبولک لس زند ئنا رکھ آتا گواچی ءُ او اوغانستان آن پیشتمنگ کیر۔
اوفتیا اقوامِ متحدہ نا ادارہ و ایلو بے سرکاری تنظیم آتتون کاریم کننگ آ رکھ ءِ و ہزار آ زالبول تے سرکاری ملازمت آتیان کشنگانے۔ و اندا سوب ءِ کہ اوغان زالبولک تینا ڈیہہ ئے الِّسا ایلو ڈیہہ تیٹ باہوٹ مننگ ءُ۔
فرانس ئٹی امیگریشن اتھارٹی نا سروک ددئیے لیشی پارینے کہ اسہ صدارتی حکم ئسے نا رد ئٹ دن انگا زالبول تیا خاص پام تننگ اُن ہرافتے اوغان چاگڑد ئٹی اہم حیثیت تخنگ یا دے کہیئلینگی ” مغربی“ ڈیہہ تتون حوالکاری نا سوب آن طالبان آن خُلیس ارے۔
لیشی پارے کہ،” اینو سر مروکا دا پنچ زالبول آک ہموفتیان ءُ۔”
