ریڈیو زْرمبش براہوئی | ریڈیو زْرمبش براہوئی,Iran-decided-to-translate-mubarak-Qazi’s-poetry-to-persian-language-,poets-and-cultural-figures-praised-and-tributed-to-Mubarak-Qazi-for-his-poetry-and-different-aspects-of-his-personality-

بلوچی زبان نا پنی آ شاعر مبارک قاضی ئے دروت ندر کننگ کن ڈائریکٹوریٹ آف کلچر بلوچستان نا بھلُنی ٹی نوری نصیر خان کلچرل کمپلکس نا کانفرنس روم ئٹی تعزیتی ریفرنس ئس اڈ تِننگا۔

پروگرام نا بناہ ئے ڈائریکٹر خدا رحیم تلاوت کلام پاک آن کرے، پروگرام نا آفیسر عمر فاروق مبارک قاضی و مستونگ تدینی نا شہید آتیکن مغفرت نا دعا کرے۔ پروگرام ئٹی بلوچی زبان و ادب نا پنی آ بندغ آتیان بیدس خانہ فرہنگ ایران نا ڈائریکٹر جنرل ابوالحسن میری ہم اوار اسّک و مبارک قاضی نا بلوچی زبان و ادبی کاریم تا سِتا ئے کرِسا پارے کہ او بیرہ بلوچستان نہ بلکہ ایران ئٹی ہم پن کشاسَس۔

او پارے کہ خانہ فرہنگ ایران نا نیمہ آن مبارک قاضی نا شاعری ئے فارسی زبان ئٹی مَٹ کننگ تون اوار زوت بلوچی، براہوئی و پشتو زبان آتیٹی مشاعرہ کننگ نا پڑو کرے۔

ایران نا تھیٹر فیسٹیول ئٹی ڈائریکٹوریٹ آف کلچر بلوچستان نا نیمہ آن تھیٹر نا فنکار آتا اواری نا سِتا ئے کرے۔ سیکریٹری کلچر منظور حسین اوار مروکا تیتون ہیت کرے و مبارک قاضی نا خاؤت تون اُست ئٹ تعزیت کرے و اونا شخصیت نا جتا اِنگا بشخ آتے مونی ہتیسا پارے کہ مبارک قاضی نا سوچ و فکر اودے بھلو شاعر ئس کیک۔

پروگرام ئٹی ڈاکٹر رحیم بخش مہر، ممتاز یوسف، افضل مراد،ڈاکٹر قیوم بیدار، ڈاکٹر زاھد دشتی، عبدالحکیم مینگل و بانک صورت بلوچ مبارک قاضی نا فن و شخصیت نا جتا اِنگا بشخ آتے تینا خیال آتا درشانی ئے کریر۔