آواران ئٹی نجمہ بلوچ نا خودکشی حکومتی کارکردگی آ سوج ئنا نشان ئسے، بلوچ وومن فورم سموراج نا ترجمان پارے کہ تدوکا دے تیٹ بلوچستان نا عیلاقہ آواران ئٹی نجمہ بلوچ ولد دل سرد گشکور غفور آباد نا اسکول ٹیچر ءِ مخبری کننگ آ بیوس کننگاسس، اونا نمن مننگ نا بھرم ٹی اونا خاؤت نا بندغ آتے زوراکی ئٹ بیگواہ کننگ و خون ئنا دڑکو تننگاسس۔ نجمہ بلوچ نا خاؤت نا رد ئٹ نجمہ بلوچ پاریسس کہ ہڑدے نا دڑکو و بیم آن مرگ جوان ءِ، ہراکان گڈ نجمہ خود کشی کرے۔
ترجمان پارے کہ ہندی مخلوق نا رد ئٹ زالبول تے کیمپ آ بٹنگیسہ اوفتے بندی کننگک و کیہی دے تیان گڈ یلہ کننگک او ودیک پارے کہ آواران گشکور سونڈم نا داد بخش بلوچ ہندا سوب آن خودکشی کرے، اودے زالبول تتون اوار وار وار آ سیکورٹی کیمپ آ بَٹِنگارہ۔ دا تدینی آن مُست ہم "آرونی ڈن آواران” ئٹی اسہ کماش ئس اندا سوب آن خودکشی کرے کہ اودے اُرا نا زالبول تے کیمپ آ ہتِنگ نا پاننگا۔ ترجمان پارے کہ دا وختا بلوچستان بندغی حق آتا لتاڑ تا قبرستان جوڑ مسنے، حکومت و فوج بلوچستان ئٹی بے سہب مسنے، نہ اوفتے قانود آن چپ ہِننگ نا خلیس ءِ نئے کہ بلوچ قوم ئنا قومی شرف و دود ئنا سما ءِ۔
او پارے کہ سیکورٹی ادارہ آک حالیت آتے جوان کننگ کن تولوک ءُ نہ کہ ہندی مخلوق نا نیاڑی تے زوراکی ئٹ بیگواہ، اوفتے بیم تننگ و بے شرفی کن۔ ہچو بندغ ئسے بیدس شاہدی آن زوراکی ئٹ بیگواہ کننگ، یا نیاڑی تے کیمپ آ خواہِفیسہ اوفتا بےشرفی کننگ و اوفتے مخبری آ بیوس کننگ بے قانودی عمل ئسے۔
ترجمان پارے کہ حکومت بلوچستان حالیت آتے جوان کننگ کن ہچ سوبر اف، بلوچستان نا حکومت و سیاسی قیادت اُسل بے سہب مسنے، بلوچ وومن فورم جہانی بندغی حق آتا ادارہ تیان خواست کیک کہ بلوچستان ئٹی زالبول تیا مروکا بےدادی و زوراکی تے توننگ کن تینا کڑد ءِ ایسری ایتِر۔
