پاکستان نا پائتخت اسلام آباد ئٹی ہنوکا دے بلوچ زالبول، چُنا،ورنا و بزرگ آتا زی آ تشدُد و تذلیل کننگ نا برخلاف اینو اِرٹمی دے آ تیوعہ بلوچستان ئٹی برانز آک برجاء ءُ ۔
بلوچ یکجہتی کمیٹی نا کال آ اینو اِرا دے ءِ تیوعہ بلوچستان ئٹی شٹر ڈاؤن و پہیہ جام ہڑتال ءِ ۔
کیہی عیلاقہ آتا بندغ آک کسر تہ زی آ ٹائر ہُشیسا و پین ہڑاند تخیسا کسرتے بند کرینو ۔
رسینگوکا حوال آتا رِد ئٹ کوئٹہ ، تُربَت ، دالبندین ، سوراب ، آواران ، و گڈانی ٹی برانزی مظاہرہ و ریلی کشنگ مننگءِ ہرافتیٹی زالبول و چُنا تا بھلو کچ ئس اوارءِ ۔
برانزی ریلی و مظاہرہ آک اسلام آباد ئٹی بلوچ زالبول ، چُنا ، پیر و ورنا تا زی آ ریاستی تشدد ، دزگیر و بیگواہ کننگ آ سخت شیف خلنگ برجاء ءِ ۔
داکان مُست بلوچ یکجہتی کمیٹی اسہ درشان ئسیٹی پارے کہ اسلام آباد آن بیگواہ مروکا خوانندہ آک و ڈیرہ غازی خان آن بیگواہ مروکا برانزیک آجو متوس گڑا تیوعہ بلوچستان بند مرو و بندغ آک برانزی ریلی کشِسہ مظاہرہ کرور و ریاست نا دہشتگردانہ پالیسی تہ برخلاف برانز کرور ۔
دا بابت ئٹ بلوچ یکجہتی نا پاننگ ءِ کہ ریاست پاکستان نا دُو آن بلوچ نسل کُشی نا برخلاف تالان آ تحریک رخشان ڈویژن ئٹی تالان ءِ ۔
درشان ئٹی پاننگا کہ جہان بلوچستان ئٹی مروکا بندغی حق آتا خلاف ورزی تے آ گام ہرفے ۔
بی وائی سی پارے کہ دا وخت آ تیوعہ بلوچستان ریاستی دہشتگردی و زوراکی نا برخلاف آ برانز کننگ ءِ ۔ اینو ریاست ئے تیوعہ بلوچستان ئٹی راجی قوت صاف ءُ پیغام ئس تسُنے کہ بلوچ راج داسا پین دہشتگردی ئے قبول کپک ۔
او پارے کہ دا وخت آ بلوچستان نا کیہی ہند آتیان ہزار آتا کچ ئٹ بندغ آک کسر تہ زی سلکوءُ ، بھلا کسرک بندءُ و تحریک برجاء ءِ ۔
درشان ئٹی پاننگا کہ ریاست بلوچستان ئٹی برجاء انگا بلوچ نسل کُشی ئے بند کے و تینا پالیسی تے بدل کے ۔
