بلوچ یکجہتی کمیٹی بلوچ خوانندہ آتا زوراکی نا بیگواہی تا چرجوئی آ اوسوز نا درشانی کرسا پارے کہ خوانندہ آتا رکھ ئنا ذمہ واری ریاست نا سیکورٹی ادارہ تا ءِ ولے بلوچستان ئٹی حالیت اسُل چَپ ءِ، داڑے خوانندہ آتا رکھ ئنا جاگہ غا اوفتا استحصال و اوفتا زوراکی نا بیگواہی تون اوار بندغی حق آتا لتاڑ ئٹی سیکورٹی ادارہ آک تُد ءُ۔ حکومت، عدلیہ و میڈیا تون اوار غٹ ادارہ آک خوانندہ آتا حق آتا رکھ ئٹی بےسُہب ءُ، و اسہ نہ اسہ وڑ اسیٹ ریاست تون اوار ءُ۔
جارکش پارے کہ کیچ آن 4 جولائی آ سالم ولد عبدالستار و اسہ پین ورنا سے اُراغان بیگواہ کننگا، مُسہ دے اسکان جتا وڑ ئنا اذیت تننگ آن گڈ اکرام ءِ یلہ کننگا ولے سالم داسکان بیگواہ ءِ و ریاستی ادارہ تا بے قانودی زندان ئٹ بند ءِ۔ سالم ءِ تینا بیگواہ مروک الہ مڷ ئنا آجوئی کن جہد کننگ نا ڈوہ ئٹی بیگواہ کننگانے۔ ہندن ڈی جی خان، کراچی تون اوار جتا علاقہ آتیان ورناک زوراکی نا بیگواہی تا گواچی مسنو ہرا اوفتا بنداوی شاری حق آتا لتاڑ ءِ۔
او پارے کہ سالم تون اوار معراج اسلم و ایلو غٹ بیگواہ غا خوانندہ آک تعلیم کن تینا اُرا تیان مُر مریرہ ولے اوفتے آسراتی تننگ نا جاگہ غا ریاست اوفتے زوراکی ئٹ بیگواہی نا گواچی کننگ ءِ۔
جارکش تینا بیان نا ایسر ئٹ پارے کہ خوانندہ آتا زوراکی نا بیگواہی تا برخلاف و اوفتا آجوئی کن شال(کوئٹہ) ٹی برانز نا پڑو کرسا الس آن خواست کرے کہ او برانز ئٹ اوار مریر او پارے کہ خوانندہ آتیان بلوچ چاگڑد نا مستقبل روشن ءِ دا وڑ اوفتے بیگواہی نا گواچی کننگ باز بھلو ڈوہ ئسے۔
ہندن جارکش عبدالحمید زہری نا آجوئی کن مروک ٹوئٹر کمپین نا ہم مخ تفی ءِ کرسا الس آن خواست کرے کہ دا کمپین ئٹ اوار مریر۔
