بلوچ اسٹوڈنٹس آرگنائزیشن آزاد نا مرکزی جارکش مستونگ تدینی آ اوسوز کرِسہ پارے کہ مستونگ تدینی بلوچستان ئٹی برجاہ آ نسل کشی نا پالیسی نا بشخ ئسے ہَرا بھاز وخت آن ریاست نا نیمہ غان برجاہ ءِ ـ بلوچستان ئٹی قوضہ گیر لشکر اسہ منظم او پالیسی ئس جوڑ کرِسہ مذہبی گروپ آتے جاگہ تسُنے ـ دا گروپ آتے جوڑ کننگ نا مسخت بلوچستان ئٹی قومی آزادی نا جدوجہد ءِ کاؤنٹر کننگ ءِ بھاز ہند آتیٹی دا وڑو گروپ آرمی و ایجنسی نا دو ئنا شیف آ ڈیتھ اسکوڈ نا شکل آ کاریم کننگ ئٹی ءُ دافتا اولی مسخت بلوچ نسل کشی ءُ قومی تحریک ءِ کاؤنٹر کننگ و بھاز ہند آتیٹی ریاست نا پالیسی ئٹ لَس عوام ءِ ٹک کننگ ئٹی ءُ تانکہ دنیا نا مون ئٹی بلوچستان ئٹی برجاہ آ آزادی نا جنگ ءِ خراب نظر ئسے ئٹ پیش کننگ ـ جارکش پارے کہ بلوچستان ئٹی داڑان مُست ہم انتہا پسند آتا دو آن بھاز بلوچ آک شہید کننگ مسُنو ۔
تحریک آجوئی نا جدوجہد آن مُست بلوچستان ئٹی دُن اِنگا گروپ آتا وجود الو وخت ئس کہ تحریک اُلس ئٹی اوار مننگ ئے بناہ کرے گڑا ریاست جتا جتا ہندا آتیان مذہبی انتہا پسند آتے کاریم ہلیسا کرے تانکہ اسہ نیمہ ئس تحریک نا رد ئٹ جہان ئٹ غلط او تاثر ئس ودی مرے و ایلو نیمہ بلوچ چاگڑد نا دروشم ءِ نظریاتی رد ئٹ خراب کیر۔ اینو ریاست ہمو پالیسی تا رد ئٹ جتا انگا ہند آتیٹی مذہبی انتہا پسند آتے ڈیتھ اسکواڈ آتا دروشم ئٹ کاریم ہلیسا بلوچ نسل کشی و ریاستی ایجنڈہ ئے مونی دننگ ءُ اینو مستونگ نا دروشم ئٹ تدینی ئس کرسا جہان ئٹ غلط او تاثر ئس ودی کننگ نا کوشست مننگ ءِ۔
بلوچستان ئٹی راجی جہد ئنا پوسکُن آ بشخ آن خُلوکا ریاست اسہ وار پین تینا پراکسی تا ذریعہ ئٹ بلوچ اُلس ئنا دھیان ئے اصل مسلہ غلامی آن مُر کرسا پین مسلہ تیتون اوار کننگ ءُ۔ بلوچستان نا چُنا چُنا دا ہیت ئے چائک دا تدینی تا پد ئٹ اصل طاغت دیر ءِ او پاکستانی ریاست دا کُل تدینی تے کیک۔
جارکش پارے کہ بلوچستان ئٹی ریاست نا سلاڈ کروکا جنگ و داٹی بلوچ آتا جان آتا ہِننگ نا زی آ جہانی ادارہ آتا بے تواری اوسوز ناک ءِ انتئے کہ جہانی طاغت آک تینا فائدہ نا حد اسکان مذہبی انتہا پسندی نا برخلاف ہیت کیرہ ولے عمل ئٹ ہرا راج آک دا جنگ ئنا گواچی ءُ و ہرا طاغت آک دافتا ذمہ وار ءُ اوفتا حوالہ ئٹ ہچو گام ئس ہرفپسہ بلکہ اوفتے جتا جتا وڑ ئٹ کُمک کیرہ ہرا اسہ بربادی ئسیان کم اف۔
