اوغانستان ئٹی طالبان حکومت نا چُنا نیاڑی تا تعلیم آ رکھ خلنگ نا سوب آن تیبہ جہان آن مذمت مننگ ءِ۔
بندغی حق آتا تنظیم ہیومن رائٹس واچ اسہ رپورٹ ئسے ٹی پارینے کہ طالبان نا بد روشتی آ ساڑی پالیسی تا سوب آن اوغانستان ئٹی مسن تِتون اوار مار تا تعلیم ہم زیمی مننگ ءِ۔ اوفتا پاننگ اس کہ مار تا خواننگ آ دا پالیسی تا زہم آتیا ہم بھاز کم پام تننگانے۔
رپورٹ ئٹی پاننگا کہ طالبان زالبول استاد آتیا ہم رکھ خلکنے ہرا نا سوب آن مار تے بے تربیت یافتہ او بندغ خوانفنگ ءُ یا اوفتا کلاس روم تیٹ استاد اسُل اف۔
تنظیم نا ٹولی کابل، بلخ، ہِرات، بامیان تون اوار ہشت جتاؤ جاگہ غا تیا 22 مار و پنچ لمّہ باوہ تون ہیت کرے۔ خوانندہ مارک و اوفتا لمّہ باوہ غا تا پاننگ ءِ کہ اسکول ئٹی جسمانی سزا تیٹ ہم ودکی مسنے۔ پُژہ غا تے وے چُنک کننگ یا موبائل فون مننگ آ چُنا تے تیبہ اسکول نا مونا سخت سزا تننگک۔
طالبان سکول تیٹ آرٹ، گوازی، انگریزی و شاری تعلیم آ رکھ خلکنے۔ ہیومن رائٹس واچ نا نمائندہ سحر فرتات تینا رپورٹ ئٹی لکھانے کہ طالبان نا سوب آن اوغان تعلیمی نظام ئٹی مار و مسن تا تعلیم ئے بے کچ نسخان مننگ ءِ۔ ڈیہہ ئنا اسکول آتا بست و بند ئے نسخان تننگ نا سوب آن اسہ تیبہ او پیڑی ئس معیاری تعلیم دوئی کننگ آن پد تمنگ کیک۔
خوانندہ غاک بندغی حق آتا تنظیم ئے پاریر کہ اسکول آتیٹ دنو کیہی ساعت گدرینگک ہرا وخت اوفتے خوانفنگ مفک، انتئے کہ استاد آتا کاختی ءِ۔ اوفتا پاننگ ءِ کہ دا نیامٹ خوانندہ غاک ہورک تولوک مریرہ۔
طالبان نا ترجمان دا رپورٹ آ ہچو تبصرہ کتنے۔ طالبان اسکول آتا بست و بند ئے مذہبی مدرسہ غا تا بست و بند ئٹ مٹ کننگ ءِ۔
طالبان نیاڑی تیا کیشتر السی جاگہ غا تیا کاریم کننگ آ رکھ خلکنے و مسن تیا ششمی جماعت آن پد تعلیم آ ہم رکھ خلکنے۔
