ریڈیو زْرمبش بلوچی | ریڈیو زْرمبش بلوچی,ریڈیو_ھال

مراگش:ریڈیو ھال?
بنگپ :ریڈیو ھال سئے شمبے ،24مارچ 2020
شنگکار:ریڈیو زرمبش بلوچی

?مراگش:ریڈیو ھال?
شنگکار:ریڈیو زرمبش بلوچی

➖➖➖➖➖➖

 

?روتاک زرمبش بلوچی?

?سئے شمبے»24مارچ 2020

?سرھال?

▪بلیدہ:پاکستانی لشکریانی دست ءَ سئے کس آوار
▪دو برات پاکستانی لشکر ءِ دست ءَ بیگواہ
▪پاکستانی لشکر ءَ دو مردم آوار جتگ
▪بلوچستان کورونا ءِ آماچ|مزن وزیر چی کنگ ءَ اِنت؟
▪چہ تبلیگ ءَ اتکگیں ھزدار ءِ جاھمنندکورونا وائرس ءِ آماچ
▪مردمانی لین،گیس ءُ آپ ءِ بل پھل کنگ بہ بہ اَنت‘مولانا ھاشمی
▪کیچ:سرجمیں کیچ ءِ بندآرگ ءِ پرمان|مردم داں 07اپریل ءَ گساں بہ نند اَنت
▪بلوچستان ءِ بند آرگ ءِ بندات|دکان ءُ کارگس بند
▪ھرنائی:سروتی بند سستگ|آپ شھر ءَ پترتگ| کشاراں تاوان مردم گٹ اَنت
▪دالبندن:تیکوانڈو ءِ گوازی گر «مھراللہ» ءِ کوش
▪زابل:بلوچستان ءُ سیستان ءِ گوریچانی دمگ ءَ 31 کس ءَ کورونا اِنت| دو کس بیران
▪دزاپ:بلوچستان ءَ نادراھی تالان بیان اِنت | 157نادراہ | 9 کس بیران
▪پھرگ:ھیرآباد ءِ سد سرریچ اِنت
▪چھبار:زیردان ءِ سد ءَ 40 میلون چارپھناتی میٹر آپ داشتگ
▪نیکشھر:ملوران کور ھار | آپ میتگاں پترتگ
▪بلوچستان ءُ سیستان: تیزیں گواتانی انگیز | گوات ءِ تہ ءَ ھرچ میٹرے ءَ 3032مایکروگرام دنزھوار
▪چھبار:نپتجاہ مساپراں نپت مہ دئے اَنت‘رھمدل بامری
▪پھرگ:چہ ھور ءُ ھاراں 2 کس بیران بیتگ
▪کسرکند:ھور ءَ کشاورداں 70 میلیارد ایرانی ریال ءِ تاوان
▪چہ سراوان ءِ سیمسر ءَ 180 کیلو تریاک گیپتگ‘سیمسری پانک
▪دزاپ: شیراز ،کرمان ءُ گرگان ءَ روکیں بالیگانی بال ماٹو
▪کورونا جھان ءَ گوں تیزی ءَ تالان بیگ ءَ اِنت‘16 ھزار مردم مرتگ | ڈبلیو ایچ او
▪سند ءِ وانگ ءُ زانگ ءِ وزیر سئید گنی کورونا وائرس ءِ آماچ

➖➖➖➖➖➖

?رودرتکی بلوچستان?

بلیدہ:پاکستانی لشکریانی دست ءَ سئے کس آوار

?بلیدہ ءِ ھند میناز ءَ پاکستانی لشکر ءَ مروچی بیگاہ ءِ ادار چار ءُ نیم ءَ بیڑ برتگ ءُ سَئے مردم آوار جتگ۔
آوار جنگ بیتگیں مردم ھیات، آبد ءُ جھانزیب ءِ ناماں زانگ بیتگ اَنت۔
---★---
دو برات پاکستانی لشکر ءِ دست ءَ بیگواہ

پاکستانی لشکر ءُ چیریں ترامگیجانی کارمنداں «ابید ء یوسپ» جاھمنند دشت سیچی ھما وھد ءَ چست کُرتگ کہ آ گاڑی ءَ سوار بیتگ ءُ چہ کیچ ءَ دشت ءَ روگ ءَ بیتگ ۔ پاکستانی لشکر ءَ آ چہ نیم راہ ءَ گاڑی ءَ ایر گیپتگ ءُ برتگ-

ھمے وڑ ءَ چہ گوادر ءَ چیریں ترامگیجانی کارمنداں «شوئیب ء یوسپ» جاھمنند دشت سیچی آوار جتگ ءُ گوں وت برتگ۔
زانگ بہ بیت کہ شوئیب گوادر ءَ مزدوری ءَ بیتگ-
آوار جنگ بیتگیں دوئیں ورنا وت ماں وت ءَ برات اَنت۔
---★---
پاکستانی لشکر ءَ دو مردم آوار جتگ

? پاکستانی لشکر ءَ بلیدہ ءِ ھند بٹ ءِ بازار ءَ بیڑبرتگ ءُ زوراکی کنان ءَ دوکس مھمد اکرم ء بائیان جاھمنند بٹ بلیدہ ءُ سدیر ء یار مھمد جاھمنند سلو بلیدہ آوار جتگ ءُ گوں وت برتگ اَنت-
---★---
بلوچستان کورونا ءِ آماچ|مزن وزیر چی کنگ ءَ اِنت؟

? بلوچستان سرکار ڈاہ دیگ ءَ اِنت کہ آ کورونا ءِ گر ءُ دار ءَ مادنیں گامگیج زیرگ ءَ اِنت۔اے رد ءَ شھرانی بندآرگ ءُ وانگجاھانی بند کنگ ءَ بلوچستان سرکار ءِ کارکرد تشے گندگ ھم بیت بلے بلوچستان ءَ 110 کورونا ءِ نادراھانی درمان ءُ پہ آیاں یک کر کرتگیں ترھجاھانی جوڑ کنگ ءَ بلوچستان ءِ کاسگ چٹیں سرکار ءِ کرد چی اِنت؟

اے کرد ھما وھدی پدر بیتگ وھدے کہ ٹی وی چینلے ءَ بلوچستان سرکار ءِ کاسگ چٹیں مزن وزیر ءِ کرد پاشک بیتگ کہ آ اے وبائی جاوراں ھم پکنگ کنگ ءُ وت ءَ وشنود کنگ ءَ اِنت۔

ٹی وی چینل ءَ جام کمال ءِ لھتے اکس شنگ کرتگ آئی ءِ تہ ءَ گندگ بیت آ گوں مردماں پکنک ءُ تر ءُ تاب کنگ ءَ اِنت۔ آئی ءِ اے کرد ءَ مردم ایر جنگ ءَ اَنت ءُ گوشگ ءَ اَنت کہ دگہ جاھاں مزن وزیر وتی زمہ واریاں پیلو کنگ ءَ اَنت ءُ بلوچستان ءِ مزن وزیر چہ وتی زمہ واریاں تچگ ءَ اِنت۔

دومی نیمگ ءَ بلوچستان سرکار ءِ سرکارگشاد «کپٹن پزیل ازگر» ءَ گْوشتگ کہ شیھ زید نادراھجاہ پہ کورونا ءِ نادراھانی درمان کنگ ءَ ساڑی کنگ بیتگ ۔
---★---
چہ تبلیگ ءَ اتکگیں ھزدار ءِ جاھمنندکورونا وائرس ءِ آماچ

?ھزدار:15 روچ پیسر ھزدار ءِ دمگ بازگیر ءِ جاھمنند «سکندر ء ھیر مھمد» پہ سئے روچی تبلیگ ءَ در کپتگ۔
لوگ ءَ واتر بیگ ءَ پد آئی ءِ جاور نگیگ بیتگ اَنت ءُ آ کارمندنودربرجاہ ءَ برجمیں یک کریں ترھجاہ ءَ برگ بیتگ ءُ ھمود ءَ چہ آزمائش گرگ ءَ پد آئی ءِ تہ ءَ کورونا وائرس گندگ بیتگ۔
---★---
مردمانی لین،گیس ءُ آپ ءِ بل پھل کنگ بہ بہ اَنت‘مولانا ھاشمی

شال:جمات اسلامی بلوچستان ءِ امیر«مولانا ابدالھک ھاشمی» ءَ گْوشتگ کہ سرکار انیگیں نگیگیں جاوراں مردمانی دو ماہ ءِ گیس، لین ءُ آپ ءِ بلاں پھل بہ کنت ۔

آئی ءَ گْوشتگ:سرکار روچ مز ءِ سر ءَ کار کنوکیں مزدوراں نگدی زر یا وراک ءُ وردن ءِ کمک ءَ بہ کنت ءُ پہ نیزگاریں مردماں بستگے ءِ جار ءَ بہ جنت۔
---★---
کیچ:سرجمیں کیچ ءِ بندآرگ ءِ پرمان|مردم داں 07اپریل ءَ گساں بہ نند اَنت

?کیچ دمگدار ءِ ماں تربت ءَ کمکار ءَ سرجمیں ھنکین ءِ بندکنگ ءِ جار پرینتگ ۔ آئی ءَ پرمان داتگ کہ داں 24 مارچ 2020ءَ بہ گر داں 07 اپریل 2020 ءِ نیمروچ ءَ کیچ ھنکین بندآرگ ءُ مردمانی تر ءُ تاب ءِ سر ءَ بندش بیت۔

اے پابندیانی رد ءَ

1۔ شھر ءِ تہ ءَ ڈن ءَ روگ ءُ آیگ ءِ سر ءَ پابندی بیت۔
2۔شھر ءِ تہ ءَ ھرچ وڑیں مچیانی سر ءَ سرجمی ءَ پابندی بیت۔
3۔درسیں سرکاری کارگس بند بہ اَنت۔
4۔چہ مروچیگ ءَ دو یا چہ دو ءَ گیشتر مردمانی ڈن ءَ تر ءُ تاب ءُ درکپگ ءِ سر ءَ سرجمی ءَ بندش جنگ بیتگ۔
5۔چہ یک کھولے ءَ تیوک ءَ یک کسے بازار ءَ چیز ءُ درمان زیرگ ءَ روت کنت۔
6۔ھما مردماں کہ جاندراھی کمک پکار بہ بیت آئی ءِ ھمراھی ءَ تیوک ءَ یک کسے روت کنت۔
7۔کماش، لنگ ءُ لنشیں مردمانی ھمراھی ءَ ھم تیوک ءَ یک کسے روت کنت۔
8۔ھما مردم کہ آ وراک ءُ وردن یا درمان بھا کن اَنت آ تیوک ءَ یک روپوکیں کارمندے داشت کن اَنت۔
9۔مزنیں دکانانی تیوک ءَ وراک ءُ وردنی بھرگ پچ بہ اَنت ءُ دگہ بھرگ بند بہ اَنت۔
10۔پرپٹانی سر ءَ دوپشتگی بند بیت۔
11۔کیچ ءِ پترگ ءُ در آیگ ءِ راھانی سر ءَ گر ءُ دار کنگ بیت۔

اے پرمان ءِ رد ءَ شھرداری ، راھبندانی گر ءُ دار کنوک، پی ٹی سی ایل،واپڈا،آپرسان ءُ جاندراھی تک ءِ مردم پہ وتی کاراں ڈن ءَ در اتک کن اَنت بلے آیاں وتی پجارتاک، کارمندی تاک ءُ چہ وتی کارگس ءِ نیمگ ءَ دزرند جتگیں زمہ واریانی تاک گون بہ بیت۔

پرمان ءِ تہ ءَ گْوشگ بیتگ کہ کسے اگاں اے پرمان ءَ مان مہ یار ایت آئی ءِ بگیری ءَ ترندیں گامگیج زیرگ بیت۔

اے پرمان پہ تربت،ھوشاب،دشت،بلنگور، بلیدہ،نوانوزامران ، تمپ ءُ مند ھنکین ءِ مردماں دیگ بیتگ۔
---★---
بلوچستان ءِ بند آرگ ءِ بندات|دکان ءُ کارگس بند

? شال:سرجمیں بلوچستان ءِ چہ مروچیگ ءَ داں 2 ھپتگ ءَ بند آرگ ءِ بندات بیتگ ءُ سرجمیں بلوچستان ءَ ھر پیمیں مزھبی ءُ سیاسی مچیانی سر ءَ پابندی جنگ بیتگ،وھدےکہ ھندی ءُ دری بالیگ سرجم ءَ بند کنگ بیتگ اَنت۔دکان ءُ کارگس ھم بند اَنت۔
---★---
سرجمیں بلوچستان ءَ کورونا وائرس ءِ پژدر ءَ نوکیں آزمائشجاہ جوڑ کنگ بیت‘کاسگ چٹیں سرکار

? شال: بلوچستان سرکار ءَ کورونا وائرس ءِ پُژدر ءَ تربت، ھزدار،کلہ ابدالا ءُ نیرآباد ءِ ڈی ایچ کیو ءَ نوکیں آزمائش جاہ برجم کنگ ءِ سوڑگ کُرتگ۔
---★---
ھرنائی:سروتی بند سستگ|آپ شھر ءَ پترتگ| کشاراں تاوان مردم گٹ اَنت

?ھرنائی ءُ آئی ءِ کش ءَ کراں ھورءَ گوں گرند ءُ گروکاں گورتگ ۔چار ادار ءَ برجاہ بیتگیں ھور ءَ پد شیپ ءُ کورں ھار کرتگ ءُ ڈگارانی بند سستگ اَنت۔

چہ «سروتی» بند ءِسدگ ءَ پد ھار ءِ آپ ھرنائی شھر ءِ دمک ءُ میتگاں پترتگ۔ ھار ءَ کوچگی ءُ کشاوردی دمگ ھم تاوانبار کرتگ اَنت۔

میتگانی مردم گٹ اَنت ءُ ھزارھانی ساد کشاوردی زمیناں رُستگیں کشار ھار ءَ برتگ اَنت۔
---★---
دالبندن:تیکوانڈو ءِ گوازی گر «مھراللہ» ءِ کوش

? دالبندن ءِ کلی رسول بکش سمالانی ءَ گپ گپ ءَ تیکوانڈو ءِ گوازی گریں ورنایے کارچ جنگ ءُ کشگ بیتگ۔

کشگ بیتگیں نودربر ءِ نام «مھراللہ ء مھمدشریپ » اَت ، کشندہ «اجاز » پجارگ ءُ دزگیرکنگ بیتگ۔
➖➖➖➖➖➖

?روکپتی بلوچستان?

زابل:بلوچستان ءُ سیستان ءِ گوریچانی دمگ ءَ 31 کس ءَ کورونا اِنت| دو کس بیران

? زابل ءِ جاندراھی زانشتجاہ ءِ سروک «ڈاکٹرھادی میرزائی» گْوشتگ کہ کورونا ءِ واگری ءَ بہ گر داں انی چہ 70 ءَ گیش چوشیں نادراہ زانشتجاہ ءِ چیردستی ءَ کارکنوکیں نادراھجاہ ءَ اتکگ کہ آیاں دم توس ءِ نادراھی بیتگ۔ چہ آزمائش گرگ ءَ آیانی تہ ءَ 31 نادراھانی تہ ءَ کورونا گندگ بیتگ۔

آئی ءَ گْوشتگ: چہ آیاں دو کس بیران بیتگ۔

آئی ءَ گْوشتگ: کورونا چہ دپ ، چم ءُ پونز ءِ راھاں مردماں گیپت مڑاھدرایں شھرمنند باید مدام وتی دستاں بہ شود اَنت ءُ داں وھدے کہ وتی دستاں گوں سابناں مہ شود اَنت وتی دپ ءُ دیم ءَ دست پر مہ کن اَنت۔

آئی ءَ گْوشتگ:مردم انچیں ورگ بہ ور اَنت کہ آیانی تہ ءَ پروٹین ءُ وٹامن ھوار بہ بیت ۔

جاندراھی ءُ درمان ءِ وزارت ءِ رد ءَ اے وھدی بلوچستان ءُ سیستان ءَ 143 کس کورونا ءِ نادراہ اِنت۔

زابل زانشتجاہ ءِ چیردستی ءَ زابل ، ھیرمند، زھک، ھامون ءُ نیمروز ءِ شھرستانی نادراھجاہ کار کنگ ءَ اَنت ءُ بلوچستان ءُ سیستان ءِ دگہ نادراھجاہ 2 جتائیں زانشتجاھانی چیردستی ءَ کار ءَ اَنت چہ آیاں لھتے دزاپ ءِ جاندراھی زانشتجاہ ءُ دگہ لھتے پھرگ ءِ جاندارھی زانشتجاہ ءِ چیردست اَنت۔
---★---
دزاپ:بلوچستان ءَ نادراھی تالان بیان اِنت | 157نادراہ | 9 کس بیران

?دزاپ:بلوچستان ءُ سیستان ءَ کورونا ءِ نادراھی گیش بیان اِنت اے وھدی 157 کس نادراہ اِنت ءُ 9 بیران بیتگ۔

دزاپ جاندراھی زانشتجاہ ءِ سروک ڈاکٹرسیدمھمدھاشمی شھری ءَ گوں اھوالکاراں گپ جنان گْوشتگ کہ داں پروردین ءِ پنچ ، شمسی ھجری سال 1399 ءُ سئے شمبے ءِ نیمروچ ءَ بہ گر 24 ادار پیسر دگہ چاردہ کس ماں بلوچستان ءُ سیستان ءِ پرگنگ ءَ کورونا ءَ گیپتگ۔

آئی ءَ گْوشتگ:چہ ایشاں 109 نادراہ دزاپ شھرستان ئیگ اَنت۔
آئی ءَ گْوشتگ:زابل زانشتجاہ ءِ رد ءَ آیانی گْور ءَ 32 نادراہ ھست ءُ پھرگ ءِ زانشتجاہ ءِ پرگنگ ءَ نادراھانی کچ 16 اِنت چہ ایشاں 9 کس بیران بیتگ۔

آئی ءَ گْوشتگ کہ دم توسی ءِ آماچیں نادراھانی کچ سرجمیں بلوچستان ءَ 1033ءَ سربیتگ چہ آیاں 76 کس بیران بیتگ۔

ڈاکٹرھاشمی شھری ءِ رد ءَ اے 76 ئیں مردم کہ ھمے میان ءَ بیران بیتگ اَنت ایشانی تہ ءَ کورونا ءِ نادراھی ءِ وائرس سدکے ءَ پجارگ نہ بیتگ بلے آئی ءَ اے گپ من اتگ کہ اے مردماں ھم دم توسی ءِ زنگ جتگ کہ کورونا ءِ نشانیاں یکے ھمیش اِنت کہ نادراہ ءِ دم پُر نہ بیت۔
---★---
پھرگ:ھیرآباد ءِ سد سرریچ اِنت

?پھرگ ءِ دمگدار «زیاالھک ھاشمزھی» ءَ گْوشتگ کہ ھیرآباد ءِ سد چہ کشیک،داروکان ءُ ھیتک ءِ کورانی نیمگ ءَ سرریچ بیتگ۔

آئی ءَ سئے شمبے ءِ روچ ءَ گوں اھوالکاراں گْوشتگ نیکیں ھور پہ پھرگ ءِ مردماں وشھالی ءِ انگیز جوڑ بیتگ۔گچینی پہ کشاورد ءُ مالداراں۔ اے وھدی درسیں آپداریں بند ءُ ھوٹگ پر اَنت ءُ سد سرریچ بیتگ۔

آئی ءَ گْوشتگ ما اوست بند ایں کہ ھورانی دْرچ ءِ برجاھی ءَ آیوکیں ماھاں 20 سال ءِ ڈکال آسر بیت ءُ آیوکیں روچ آبادی ءُ سرسبزی روچ بہ اَنت۔

ھیرآباد ءِ سد نوسال ءَ پد سرریچ بیتگ۔اے سد داں 50 سال ءَ پہ پھرگ ءِ شھرستان ءَ ورگی آپ ءُ 600ایکٹر کشاوردی زمینانی آپ دیگ ءَ جوڑ کنگ بیتگ کہ کشیک کور ءِ سر ءَ اَنت۔
---★---
چھبار:زیردان ءِ سد ءَ 40 میلون چارپھناتی میٹر آپ داشتگ

?بلوچستان ءُ سیستان ءَ آپ پجارینوکیں شرکت ءِ سرمستر «مھمددلمرادی»ءَگْوشتگ کہ چہ گوات پجاری تک ءِ نیمگ ءَ رس اتگیں پیش گوشیانی بنیاد ءَ ما ھمے رنگ ءَ گر ءُ دار کرتگ کہ چہ ھورءُ ھار ءُ تاوان مہ بیت ءُ آپ زیردان ءِ سد ءَ بہ رو اَنت ۔

آئی ءَ گْوشتگ زیردان ءِ سد 207 میلون چارپھناتی میٹر آپ دار ایت کہ پہ چھبار شھرستان ءِ مردمانی ورگی ءُ کشاوردی لوٹاں کاربندگ بہ اَنت۔
---★---
نیکشھر:ملوران کور ھار | آپ میتگاں پترتگ

? نیکشھر دمگ ءِ «ملوران» نامیں کوچگ ھار ءِ آماچ اِنت ءُ کور ءِ آپ میتگ ءِ نزیک ءَ سربیتگ۔

ملوران ءِ کوچگدار «ابدرھمان رئیسی» ءِ رد ءَ چہ ھور ءَ دمگ ءَ ڈکال آسر بیتگ ءُ ورگی آپ ءِ تنگی نیست بلے پہ ھار ءِ گر ءُ دار ءَبند نیست اَنت پمیشکا مردم گوں دوسری جیڑھے ءَ دوچار اَنت۔

آئی ءَ گْوشتگ:ملوران ءِ کور ءَ ھار کرتگ ءُ آپ ڈگار ءُ میتگانی تہ ءَ پترتگ چہ ایشی ءَ دگ پرشتگ اَنت ءُ مردماں تاوان بیتگ۔
آئی ءَ چہ نیکشھر دمگ ءِ واکدراں لوٹ کرتگ کہ زیت تر اے نیمگ ءَ دلگوش بہ کن اَنت داں کہ تاوان ءِ گر ءُ دار بہ بیت۔

آئی ءَ گْوشتگ کہ پہ ھار ءِ گر ءُ دار ءَ چیزے کار بیتگ اَت بلے ھما جاھاں کہ گیشتر کار پکار بیتگ دنیگت منتگ اَنت ءُ مئے اوست ھمیش اِنت کہ چہ تاوان ءَ پیش آ اُود ءَ ھم پیشگیریں بند بندگ بہ اَنت۔

زرمبش گال زانتی:دمگدار:دھیار
---★---
بلوچستان ءُ سیستان: تیزیں گواتانی انگیز | گوات ءِ تہ ءَ ھرچ میٹرے ءَ 3032مایکروگرام دنزھوار

? بلوچستان ءُ سیستان ءَ گوات پجاری تک ءِ مستر «موسن ھیدری» ءَ گْوشتگ کہ گوستگیں شپ ءَ گوات ءَ 101 کیلومیٹر مان ادارے ءِ تیزی ءَ کش اتگ ءُ زابل ءِ گوات ءِ تہ ءَ یک میٹرے ءَ کساس 3032 مایکروگرام دنزھوار بیتگ کہ اے چہ انچائیں روچاں 20 برابر گیشتر اَت۔

آئی ءَ گْوشتگ زیکیں سھب ءَ بہ گر داں مروچیگیں سھب ءَ زابل ءَ گوات ءِ تیزی 101،نسرت آباد ءَ 94، دزاپ ءَ79 ءُزھک ءَ ادارے 76 کیلومیٹر بیتگ۔

آئی ءَ گْوشتگ کہ نی جاور ھمروچیگیں وڑ ءَ اَنت۔ گرمی داں آدینگ ءِ روچ ءَ ھمے پیم برجاہ مان ایت ءُ شمبے ءَ چہ اے ھپتگ ءَ گیشتر گرم بیت۔

گال زانتی:ادار:ساعت، گھنٹہ
---★---
چھبار:نپتجاہ مساپراں نپت مہ دئے اَنت‘رھمدل بامری

?چھبار ءِ نپتجاہ گْوشگ بیتگ اَںت کہ آ مساپراں نپت مہ دئے اَنت۔

کمک استاندار ءُ شھرستان چھبار ءِ دمگدار «رھمدل بامری» ءَ گْوشتگ کہ مساپراں دیگ بیتگیں 48 ادار ءِ مھلت آسر بیتگ پمیشکا آیانی چہ شھر ءَ درآیگ ءِ دیمگیری ءَ نپتجاہ آیاں نپت مہ دئے اَنت۔

رھمدل بامری ءَ گْوشتگ:چد ءُ پیش مساپراں گْوشگ بیتگ کہ آ داں 48 ادار ءِ تہ ءَ ھمینچک زیت کہ آ در کپت کن اَنت چہ شھر ءَ در بہ کپ اَنت۔

آئی ءَ گْوشتگ کہ نی مھلت آسر بیتگ ۔ مھمانجاہ،سویٹ داروک،مساپرجاہ ءُ ھما مردم کہ وتی لوگاں باڑھی دئے اَنت آیاں بیھار دئے ایں کہ اگاں آیانی گور ءَ تر ءُ گرد ءَ اتکگیں مردم گندگ بوت، آیانی بگیری ءَ راھبندی گامگیج زیرگ بیت۔

چھبار ءِ دمگدار ءَ گْوشتگ:کوورنا وائرس ءِ گر ءُ دار ءُ پہ مردمانی جاندراھی ءِ پھریزگ ءَ مساپراں ھژدار دیگ بیتگ کہ آ اے دمگ ءَ سپر مہ کن اَنت۔

آئی ءَ گْوشتگ کہ لھتے مردماں مساپر چہ راستیں دگ ءَ گستا راہ پیش داشتگ اَنت آ مردم پجارگ بیتگ اَنت ءُ زیت آ گوں آمیدگس ءَ دیم پہ دیم کنگ بہ اَنت۔

آئی ءَ وتی گپانی تہ ءَ گْوشتگ:پہ کورونا ءِ گر ءُ دار ءَ چھبار ءِ درسیں تک وتی کاراں کنگ ءَ اَنت ءُ کسے کہ رسانکدراں وائرس ءِ درگت ءَ دروگیں گپے بہ جنت آ ھم آمیدگس ءَ پیش کنگ بیت۔
---★---
پھرگ:چہ ھور ءُ ھاراں 2 کس بیران بیتگ

?پھرگ ءِ پیش نادراھجاھی ایمرجنسی ءِ سروک «ڈاکٹرنادرستودہ» ءَ گْوشتگ : گوستگیں روچ ءَ نیکشھر ءُ ایرانشھر ءِ میان ءَ تریلی یے چہ پول ءَ جھلاد بیتگ چہ ایشی ءَ رانندگ بیران بیتگ۔

ھمے پیم یک مردمے سرباز ءَ کور ءَ بڈ اتگ۔
---★---
کسرکند:ھور ءَ کشاورداں 70 میلیارد ایرانی ریال ءِ تاوان

? سئے ءُ چار پروردین 1399 ھمدپ گوں 22 ءُ 23 مارچ 2020 ءَ بیتگیں ھور ءُ ھاراں کسرکند شھرستان ءِ کشاورداں 70 میلیارد ریال ءِ تاوان بیتگ ۔

کسرکند شھرستان ءِ کشاوردی تک ءِ چارگزار ابدلناسررئیسی ءَ گوں اھوالکارے ءَ گْوشتگ چہ انیگیں ھوراں 30 کھن، 70 ایکٹر کشار ءُ 50ایکٹرباگانی برورداں تاوان بیتگ۔
---★---
چہ سراوان ءِ سیمسر ءَ 180 کیلو تریاک گیپتگ‘سیمسری پانک

? سرکاری واکداراں ڈاہ داتگ کہ آیاں چہ سراوان ءَ 180 کیلوگرام تریاک گیپتگ۔

بلوچستان ءُ سیستان ءِ سیمسری پانک ءِ جھگیر سرھنگ «مھمدالی مھمدی» ءَ گْوشتگ کہ چیریں ھالے ءِ پد ءَ گامگیج زیرگ بیتگ ۔ شپوک دلمانگ بیتگ اَنت کہ وتی بار ءَ ڈیھ ءِ تہ ءَ بہ یار اَنت کہ سیمسری پانکاں آیانی سر ءَ بیڑ برتگ پمیشکا آیاں وتی بار یلہ داتگ ءُ تتکگ اَنت۔
---★---
دزاپ: شیراز ،کرمان ءُ گرگان ءَ روکیں بالیگانی بال ماٹو

?بلوچستان ءُ سیستان ءِ بالی پٹانی رھوت دار «ھمیدبارانی» ءَ گوں اھوالکاراں گْوشتگ کہ ڈیھ ءِ بالیگی تک ءُ کورونا وائرس ءِ گر ءُ دار ءَ جوڑ بیتگیں پتر ءِ گْوشگ ءَ چہ دزاپ ءِ میان استمانی بالی پٹ ءَ بال کنوکیں سئے بال ماٹو کنگ بیتگ۔

آئی ءَ گْوشتگ:دزاپ داں شیراز ءُکرمان،دزاپ داں کرمان ءُ گرگانءُ دزاپ داں گرگان ءَ روکیں بالیگانی بال داں دیمتر ءِ جار ءَ ماٹوکنگ بیتگ اَنت۔

آئی ءَ گْوشتگ ھمے پیم تھران ءُ مشھد ءِ بالانی تہ ءَ ھم آیوکیں روچاں کمی کنگ بیت۔

چہ ایشی ءَ پیش دزاپ ءِ بالی پٹ ءَ ھمک ھپتگ 80 بالیگ ڈیھ ءِ تھی شھراں ءُ لھتے دری ڈیھاں شتگ چوش کہ بگداد،دبی، نجپ ءُ۔۔۔

زرمبش گال زانتی:ماٹو:لغو،معطل

?جھان?

کورونا جھان ءَ گوں تیزی ءَ تالان بیگ ءَ اِنت‘16 ھزار مردم مرتگ | ڈبلیو ایچ او

? جھانی جاندراھی گل ءِ نیمگ ءَ شکساتگیں گزارش ءِ رد ءَ داں سئے شمبے 24 مارچ 2020ءَ سرجمیں جھان ءَ کورونا ءَ 16 ھزار مردم کشتگ ۔

جھانی جاندارھی گل ءِ لس ترامکار ٹیڈروس اڈھانوم گبریوس ءَ گوں اھوالکاراں تران کنان ءَ گْوشتگ کورونا ءِ نادراھی پہ سرجمیں جھان ءَ ترسے جوڑ بیتگ ۔ سرجمیں جھان ءَ ایشی ءِ بگیری ءَ جنگ ءِ جار پرینگ لوٹ ایت۔

گبریوس ءَ گْوشتگ کہ جھان ءَ چاگردی سرگرمیانی تہ ءَ کمی اتکگ،مردم گوں یک دومی ءَ دیر اَنت ، لوگاں نشتگ اَنت بلے اے جیڑہ چوش نہ گیش ایت مارا چہ وائرس ءَ سانمند بیتگیں مردمانی نشاندئی کنگی اِنت ءُ اے مردم کشیں نادراھی ءِ سر ءَ ارش کنگی اِنت داں اے بنگوج کنگ بہ بیت۔

آئی ءَ گْوشتگ کہ واگریں نادراھی گوں تیزی ءَ شنگ بیگ ءَ اِنت ءُ اے وھدی چہ سئے لک ءَ برز مردم نادراہ اِنت بلے جھان ءِ تہ ءَ ایشی ءِ دیم ءِ دارگ ءِ بودشت ھست۔

آئی ءَ گْوشتگ کہ ھمے ھپتگ ءَ گوں جی 20 ءِ راھشوناں گپ جن ایں ءُ آیاں پھریزی کاربوجانی پیدوار ءِ گیش کنگ ءِ درگت ءَ ھمکاری ءَ کار کنگ ءِ گْوش ایں ۔

آئی ءَ لوٹ کرتگ کہ جاندراھی تک ءَ کارکنوکیں مردماں آسراتی دیگ بہ بہ بیت داں مردمانی زند چہ تاوان ءَ پھریزگ بہ بہ اَنت۔
---★---
نوکتریں شمار?

جاور گزراش #63
کورونا وائرس ءِ نادراھی 2019(کووِڈ-19)
اے شمارینک چہ راجی واکدارانی نیمگ ءَ گزارش کنگ بیتگ اَنت ، ادار ءُ پاس: 10:00 میان یورپی اَدار ، 23 مارچ 2020

گْوستگیں 24 ادارانی تہ ءَ درسیں ( نوکتریں) کیس | کمانکانی تہ ءَ نوکتریں کیس دیگ بیتگ اَںت

سرجمیں جھان ءَ
من اتگیں 332930(40788)
مرتگیں 14510(1727)

ساکمیں ساوڑ ءِ روٹکی دمگ (Western Pacific Region)
من اتگیں 95637(850)
مرتگیں 3473(35)

یورپی دمگ
من اتگیں 171424(20131)
مرتگیں8743 (1318)

زرباری-رودرتکی ایشیائی دمگ
من اتگیں1776(519)
(8)مرتگیں 58(13)

رومی ساوڑ ءِ رودرتکی دمگ Eastern Mediterranean Region
من اتگیں25375(1706)
مرتگیں 1741(145)

امریکائی دمگ
من اتگیں 37016(17331)
مرتگیں 465(213)

اپریکائی دمگ
من اتگیں 990(251)
مرتگیں 23(3)

ڈبلیو ایچ او (جھانی جاندراھی گل) ءِ پہ ترس ءَ دیگ بیوکیں ڈاہ ، سک مزن اِنت۔

کورونا ءِ پژدر ءَ جتائیں ڈیھاں مرگ میر ءُ گیپت ءُ گیر ءِ جاورانی چارگ ءَ جھل ءِ چیڑو ءَ گر اِت :
https://www.who.int/…/novel-coronavirus-2…/situation-reports

۔۔۔ ۔
دلگوش : اے شمارینک چہ جھانی جاندراھی گل ءِ نیمگ ءَ پہ مردمانی سرپد کنگ ءَ دم پہ دم ءَ شنگ کنگ بیگ ءَ اَنت

ریڈیوزرمبش بلوچی ءَ جھانی جاندراھی گل ءِ اے شمارینک پہ بلوچانی سرپدی ءَ ماں بلوچی زبان ءَ ترینتگ داں مردم واگریں نادراھی کورونا ءِ درگت ءَ نوکیں جاور ءَ چہ باورکرزیں بنشون ءَ سرپد بہ بہ اَنت

#کورونا_بلوچی
---★---
سند ءِ وانگ ءُ زانگ ءِ وزیر سئید گنی کورونا وائرس ءِ آماچ

? سند: پاکستانی استان سند ءِ وانگ ءُ زانگ ءِ وزیر سئید گنی کورونا وائرس ءِ آماچ اِنت ءُ آئی ءَ چاگردی رسانکدر ٹویٹر ءَ شکساتگیں وتی درشانے ءَ اے گپ منّ اِتگ۔

سئید گنی ءَ وتئ ٹویٹر کلوھے ءَ گْوشتگ کہ من گوستگیں روچ ءَ کورونا وائرس ءِ آزمائش کُرتگ چہ آمائش ءَ منی تہ ءَ کورونا وائرس گندگ بیتگ۔

آئی ءَ گوشتگ:ھرچی کہ آزمائش ءَ نبشتگ من ءَ چوشیں چیزے ءِ سما بیگ ءَ نہ اِنت ءُ من وت ءَ جاندراہ مارگ ءَ آں۔گِس ءَ یک گورے ءَ نشتگ ءُ وتی زمہ واریاں پیلو کنگ ءَ آں۔

وانگ ءُ زانگ ءِ وزیر ءَ گوں مردماں دزبندی کرتگءُ گْوشتگ کہ گِساں بہ بہ اِت ءُ چہ کورونا ءَ وت ءَ بہ پھریز اِت ءُ آدگہ مردمانی انان ءَ بدار اِت۔ شھرمنند سند سرکار ءِ پرماناں گوں سنگینی ءَ بہ زیر اَنت۔

آئی ءَ گْوشتگ کہ اگاں ما وتی گِساں بہ نند ایں گڑا ما اے وبا ءِ گِر ءُ دار ءَ کُرت کن ایں۔
?