اسلام آباد: زور بیگواھیں ڈاکٹر اکبر مری ءِ جنک اسلام آباد ءَ شتگ ءُ بلوچ یکجھتی کمیٹی ءِ نیمگ ءَ برجاھیں زھرشانی گدان ءَ نشتگ ءُ آئی زھرشانی نندانک ءَ پہ وتی پت ءِ آجوئی ءَ گوں اھوالکاراں پریس کانپریس کرتگ۔
آئی ءَ گوشتگ کہ منی پت ایم بی بی ایس ءِ ڈاکٹرے ءُ آئی ءَ چہ روس ءَ ایم بی بی ایس ڈاکٹری ءِ ڈگری گپتگ ءُ آ درسرکاری نادراھجاہ ءَ شال ءَ کار ءَ بوتگ۔ آ بلوچستان جاندراھی بھرگ ءِ نیمگ ءَ سروگانی ءِ پرز ءِ پیلو کنگ ءَ کوھلو ءَ بوتگ، ناگت ءَ چہ ما پگرگ بوتگ۔ چو بلوچستان ءِ آدگہ جاھانی وڑ ءَ 2005 ءَ کوھلو کاھان ءِ جاور ناگیگ بوتگ اَنت ءُ کاھان ءِ ھندی مردم پہ لڈ ءُ بار کنگ ءَ لاچار بوتگ اَنت پمیشکا منی کھول چہ کاھان ءِ جاورانی ناگیگی ءِ سوب ءَ سریاب شال ءَ آتکگ ایں۔ منی پت ڈاکٹر مری 2006 ءَ شال ءَ کلینکے پچ کرتگ ءُ ھما کلینک ءَ 20 اپریل 2010 ءَ روچ ءِ یک ءَ پاکستانی لشکر ءُ پولیس ءِ کارمند آتکگ اَنت ءُ ارزی ءُ آمیدگس ءِ پرمان ءَ آبید زور بیگواہ اِش کرتگ۔
آئی ءَ گوشتگ کہ پاکستانی لشکر ءُ پولیس ءِ دست ءَ پت ءِ زوریں بیگواھی ءَ پد ما پولیس بنجل ءَ ایپ آئی آر نبشتہ کرتگ ءُ جتائیں جاھاں پہ وتی پت ءِ آجوئی ءَ توار چست کنگ بندات کرتگ۔ آ وھد ءَ پاکستان ءِ چیپ جسٹس چودری اپتکار اھمد ءِ سروکی ءَ یک کمیشنے جوڑ کنگ بوتگ ءُ بلوچستان ءَ زوریں بیگواھیں مردمانی کیس یاداشت کنگ بوتگ اَنت۔ ھمے کمیشن ءَ منی پت ڈاکٹر اکبر مری ءِ کیس ھوار بوتگ ءُ کمیشن ءَ بس دروگیں دلبڈی داتگ۔
آئی ءَ گوشتگ کہ چہ ایشی ابید یک رندے پد ءَ ما پہ وتی پت ڈاکٹر اکبر مری ءِ کیس ءَ اسلام آباد ءَ آتکگیں مارا ھچ نہ رستگ۔ بلے ما بے اوست نہ بوتگ ایں ءُ یک رندے پد ءَ گوں اوست ءَ اسلام آباد ءَ آتکگیں دانکہ سرکار مئے توار ءَ گوش بدار ایت۔ چہ 2010 ءَ داں انوں سینزدہ سال گوستگ ما ھچ نزانیں کہ آ کج ءَ اِنت ءُ ما انگت ءَ ھمے اوست ءَ نشتگ ایں کہ منی پت آجو بیت۔
آئی ءَ گوشتگ کہ ما سکا جنجالانی دیمپان ایں ءُ نوں چہ درداں درکنگ لوٹ ایں۔ ما اوست ءَ دار ایں کہ انوگیں چیپ جسٹس ءُ اسلام آباد ءِ واکدار نندانک ءَ نشتگیں کھولاں بے اوست نہ کن اَنت ءُ مئے گون ءَ انساپ کنگ بیت۔
آئی ءَ اھوالکارانی منت گپتگ ءُ گوشتگ کہ ما چہ شما ھمے اوست ءَ دارایں شما مئے پریاتاں داں انساپ دیوکیں ادارھاں سر کن اِنت۔
